गुजरातच्या अहमदाबाद इथं भीषण विमान अपघात घडला. गुरुवारी एअर इंडियाचं AI171 विमान अहमदाबादहून लंडनच्या गॅटविकला जाणार होते. मात्र उड्डाणानंतर अवघ्या काही मिनिटांतच ६२५ फूटावरून हे विमान खाली जमिनीवर कोसळले. मेघानीनगर भागात या विमानाचा अपघात झाला तिथे BJ मेडिकल कॉलेज आणि हॉस्पिटल होते. याच मेडिकल कॉलेजच्या हॉस्टेल इमारतीवर दुर्घटनाग्रस्त विमान धडकले. हॉस्टेलमध्ये कॅन्टिनमध्ये मेडिकलचे विद्यार्थी जेवत असताना हा अपघात घडला. या दुर्घटनेत २० मेडिकल विद्यार्थ्यांचा मृत्यू झाल्याची भीती आहे. अद्याप याची अधिकृत माहिती समोर आली नाही.
BJ मेडिकल कॉलेजच्या हॉस्टेलवर एअर इंडियाचे विमान कोसळले. त्यानंतरचे अनेक फोटो समोर आलेत. या फोटोत विमानाचा मागील भाग इमारतीत घुसल्याचे दिसत आहे. विमानाच्या धडकेमुळे संपूर्ण इमारतीला आग लागली आणि आकाशात काळा धूर पसरला. सध्या घटनास्थळी एनडीआरएफ टीमसह अग्निशमन दलाच्या गाड्या रेस्क्यू ऑपरेशन करत आहेत. त्याशिवाय आणखी २ टीम तिथे रवाना झाल्यात. या दुर्घटनेनंतर अहमदाबादच्या सिव्हिल रुग्णालयापर्यंत ग्रीन कॉरिडोर बनवण्यात आला आहे. जिथे जखमींवर उपचार सुरू आहेत. अहमदाबादचे महापालिका आयुक्त, पोलीस आयुक्त यांच्यासह सर्व वरिष्ठ अधिकारी घटनास्थळी हजर आहेत.
विमान दुर्घटनेत रस्ते वाहतुकीवर परिणाम
घटनास्थळी ३ अग्निशमन दलाच्या गाड्या पोहचल्या असून या दुर्घटनेतील जखमींना आणि तिथे रेस्क्यू ऑपरेशनसाठी परिसरातील काही रस्ते वाहतुकीसाठी बंद करण्यात आले आहे. विमान इमारतीला धडकल्यानंतर मोठा स्फोट झाला. विमानाला आग लागली. त्यानंतर संपूर्ण विमान जळून खाक झाले. परिसरात धुराचे साम्राज्य पसरले होते. जखमींना तातडीने उपचारासाठी अहमदाबादच्या सिव्हिल रुग्णालयात दाखल केले. रेस्क्यू ऑपरेशनसाठी येणारी वाहने, रुग्णवाहिका यांच्यासाठी वाहतूक वळवण्यात आली आहे. या दुर्घटनेत किती जणांचा मृत्यू झाला त्याची माहिती सार्वजनिक केली नाही.
दरम्यान, या दुर्घटनेनंतर अहमदाबादच्या सर्व रुग्णालयांना अलर्ट करण्यात आले आहे. आपत्कालीन सेवा सक्रीय केल्या आहेत. दुर्घटनास्थळापासून रुग्णालयापर्यंत पोहचण्यासाठी ५ रुग्णवाहिका तयार आहेत. दुपारी १.३९ मिनिटांनी अहमदाबादच्या रनवे २३ वरून एअर इंडियाच्या या विमानाने उड्डाण केले होते. त्यानंतर काही मिनिटांत विमान नागरी वस्तीत कोसळले. उड्डाण भरल्यानंतर पायलटने ATC ला MayDay कॉल दिला होता परंतु त्यानंतर विमानाशी संपर्क तुटला. विमानात २४२ प्रवासी होते. त्यात २ पायलट, १० कू मेंबर्ससह २३० प्रवासी होते.