नवी दिल्ली - एका पित्याने आपल्या आजाऱ्या मुलासाठी पंतप्रधान नरेंद्र मोदी (PM Narendra Modi) आणि गृहमंत्री अमित शहा (Home Minister Amit Shah) यांच्याकडे मदत मागितली आहे. आजारी मुलाला जपानमधून (Japan) भारतात (India) आणण्यासाठी प्रयत्न करणाऱ्या पित्याने मोदी आणि शहांना पत्र लिहून मदतीसाठी याचना केली आहे. हरिभाई पटेल (Haribhai Patel) असं या पित्याचं नाव असून त्यांचा मुलगा जयेश पटेलला (Jayesh Patel) भारतात आणण्यासाठी पत्र लिहिलं आहे. जयेशला सध्या जपानमधील एका रुग्णालयात दाखल करण्यात आलं असून उपचार सुरू आहेत.
हरिभाई पटेल यांना आपल्या आजारी मुलाला भारतात परत घेऊन यायचे आहे. मात्र जयेशला परत आणण्यासाठी तब्बल सव्वा कोटींचा खर्च अपेक्षित आहे. मात्र एवढा खर्च करण्यासाठी कुटुंब सक्षम नाही. त्यासाठीच त्यांनी नरेंद्र मोदी आणि अमित शहांकडे मदत मागितली आहे. गुजरातमधील अहमदाबाद शहरातील घाटलोडिया भागात शायना सिटी येथे हरिभाई पटेल राहतात. मात्र सध्या ते मुलाच्या देखभालीसाठी आपात्कालीन व्हिसावर जपानमध्ये राहत आहेत. त्यांचा मुलगा जयेश पटेल हा गेली अडीच वर्षे जपानमध्ये काम करत आहे. जयेशला पत्नी आणि दोन मुली असून,ते सर्वजण भारतात हरीभाई यांच्यासमवेत राहतात.
जयेशची पत्नी जलपाने सहा महिन्यांपूर्वीच एका मुलीला जन्म दिला आहे. अशा परिस्थितीत एकट्यानं परदेशात आपल्या मुलाची देखभाल करणं हरीभाई यांना खूप कठीण जात आहे. जयेशला क्षय रोग (TB) झाल्याने 5 ऑक्टोबर 2020 मध्ये शिबुकावा मेडिकल सेंटरमध्ये दाखल करण्यात आलं. जयेश त्यातून बरा होत असतानाच 7 जानेवारी रोजी त्याला ब्रेन स्ट्रोक (Brain Stroke) आला आणि त्याची तब्ब्येत खूपच खालावली. त्याच्यावर या रुग्णालयात उपचार सुरू आहेत. मात्र इथल्या उपचारांचा खर्च अत्यंत महाग असल्याने हरीभाई यांना तो परवडणे अशक्य आहे. त्यामुळे आपल्या मुलाला भारतात परत नेऊन तिथे त्याच्यावर योग्य ते उपचार केले जावेत अशी त्यांची धडपड आहे.
"आपल्या मुलाची संपूर्ण जबाबदारी घेण्यास आपण तयार असून, त्याला परत भारतात नेण्यासाठी भारतीय अधिकाऱ्यांनी मदत करावी" असं हरिभाई पटेल यांनी म्हटलं आहे. "माझा मुलगा क्षयरोगातून 80 टक्के बरा झाला होता पण आता तो मेंदूपर्यंत पसरल्याने त्याची तब्ब्येत खूपच खराब झाली आहे. त्यामुळे कुटुंबाला काळजी लागून राहिली आहे" अशी माहिती हरिभाई यांनी एका इंग्रजी वृत्तपत्राला दिली आहे. तसेच खासदार हसमुख पटेल यांनाही पत्र लिहून मदतीचं आवाहन केलं आहे. हसमुख पटेल यांनी जपानमधील भारतीय दूतावासाला पत्र लिहून एअर इंडियाच्या विमानाद्वारे जयेश पटेल याला भारतात आणण्याची सोय करण्याबाबत सूचना दिली आहे. एका हिंदी वेबसाईटने याबाबतचे वृत्त दिले आहे.