अहमदाबादमधीलएअर इंडियाच्या विमानाच्या अपघातानंतर अपघात स्थळावरून आतापर्यंत २७० जणांचे मृतदेह सापडले आहेत. यामध्ये विमानातील प्रवासी आणि बीजे मेडिकल कॉलेजचे इंटर्न ड़ॉक्टरही आहेत. या बहुतांश मृतदेहांची डीएनए टेस्ट करण्यात आली आहे. यापैकी ७ जणांचे डीएनए त्यांच्या नातेवाईकांशी जुळले असून हे मृतदेह त्यांच्या ताब्यात देण्यात आले आहेत.
माजी मुख्यमंत्री विजय रुपाणी यांच्या मृतदेहाची ओळख अद्याप पटलेली नाही. विमानामध्ये ४४२ जण होते. पैकी एक प्रवासी आश्चर्यकारकरित्या बचावला आहे. यामुळे सुमारे २४१ प्रवासी आणि हॉस्टेलमधील इंटर्न डॉक्टर असे मिळून २७० मृतदेह आहेत. पाच डॉक्टरांचे मृतदेह सापडल्याचे सांगितले जात आहे, परंतू, विमानाच्या प्रवाशांच्या संख्येपेक्षा जास्त असलेले मृतदेह कोणाचे आहेत हे अद्याप स्पष्ट होऊ शकलेले नाही. अपघातावेळी हॉस्टेलच्या मेसमध्ये ५० हून अधिक लोक होते, असे सांगितले गेले आहे.
जसेजसे मृतांचे नातेवाईक पोहोचले आहेत, तसे डीएनए टेस्ट केले जात आहेत. परदेशातील प्रवाशांचे देखील नातेवाईक अहमदाबादला पोहोचले आहेत. त्यांचेही डीएनए सॅम्पल घेतले जात आहेत. येत्या काही दिवसांत सर्व मृतदेहांची ओळख पटण्याची अपेक्षा आहे. यानंतर मृतांचा खरा अधिकृत आकडा जाहीर केला जाणार आहे.
सिव्हिल हॉस्पिटलमध्ये २७० हून अधिक मृतदेहांचे पोस्टमार्टेम झाले आहे. यापैकी २२० मृतदेहांचे डीएनए सॅम्पल घेण्यात आले आहेत. सात मृतदेहांची ओळख पटल्याचे वृत्त दैनिक भास्करने दिले आहे. विमान अपघात प्रकरणी पोलिसांनी अपघाती मृत्यूचा गुन्हा दाखल केला आहे. तसेच विमान अपघात तपास ब्युरो (AAIB) सह ८ एजन्सींनी या प्रकरणाचा तपास सुरू केला आहे.
या अपघातात युकेचे देखील प्रवासी मोठ्या संख्येने असल्याने तेथील तपास यंत्रणा देखील भारतात दाखल झाल्या आहेत. यामध्ये युनायटेड किंग्डमची हवाई अपघात चौकशी शाखा (UK-AAIB), युनायटेड स्टेट्सचे राष्ट्रीय वाहतूक सुरक्षा मंडळ (NTSB), फेडरल एव्हिएशन अॅडमिनिस्ट्रेशन (FAA) यांचा समावेश आहे.