पतीची हत्या करून हार्टॲटॅकचा रचला बनाव, २० दिवसांत उरकलं दुसरं लग्न, पण खुनी पत्नीचा असा फसला डाव

Karnataka Crime News: प्रेमसंबंधांमध्ये अडथळा ठरणाऱ्या पतीची पत्नीनेच तिच्या प्रियकरासोबत मिळून हत्या केल्याची धक्कादायक घटना कर्नाटकमधील टुमकूर जिल्ह्यात घडली आहे.

प्रेमसंबंधांमध्ये अडथळा ठरणाऱ्या पतीची पत्नीनेच तिच्या प्रियकरासोबत मिळून हत्या केल्याची धक्कादायक घटना कर्नाटकमधील टुमकूर जिल्ह्यात घडली आहे. या महिनेले तिच्या पतीची हत्या करून त्याचा मृत्यू हृदयविकाराच्या झटक्याने झाल्याचे भासवले. मात्र पतीच्या मृत्यूनंतर अवघ्या २० दिवसांनंतरच तिने दुसरं लग्न केल्याने कुटुंबीय आणि नातेवाईकांचा संशय बळावला. त्यानंतर या प्रकरणात पोलिसांचीही एंट्री झाली आणि तब्बल महिनाभरानंतर या खुनाच्या गुन्ह्याला वाचा फुटली. आता पोलिसांनी आरोपी पत्नी आणि तिच्या प्रियकराला अटक केली आहे. तसेच आरोपींनी गुन्ह्याची कबुली दिली आहे.

याबाबत मिळालेल्या अधिक माहितीनुसार तुमकूरमधील दसराहल्ली गावातील रहिवासी असलेल्या परमेश याचा ३० जानेवारी रोजी अचानक मृत्यू झाला. परमेश याचा हृदय विकाराच्या तीव्र धक्क्याने मृत्यू झाल्याचे पत्नी आशा हिने कुटुंबीयांना सांगितले. अचानक झालेल्या मृत्यूमुळे कुटुंबीयांना धक्का बसला होता. तसेच परमेश याच्यावर घाईघाईने अंत्यसंस्कारही  उरकण्यात आले. मात्र हा एका कटकारस्थानाचा भाग आहे, याची कुटुंबीयांना जाणीवही झाली नाही. पण परमेशच्या मृत्यूनंतर अवघ्या २० दिवसांनी त्याची पत्नी आशा हिने मित्र चंद्रप्पा याच्यासोबत लग्न केले, तेव्हा कुटुंबीयांना आणि ग्रामस्थानांही आश्चर्याचा धक्का बसला. गावात कुजबूज सुरू झाली. त्यातूनच परमेश याच्या बहिणींना संशय आला. तसेच त्यांनी या प्रकरणी हेब्बूर पोलीस ठाण्यामध्ये तक्रार दिली.

आशा आणि चंद्रप्पामध्ये आधीपासून संबंध असल्याचा संशय कुटुंबीयांना होता. त्यात परमेशच्या लग्नानंतर दोघांनीही घाईगडबडीत लग्न उरकल्याने हा संशय अधिकच बळावला. त्याआधारावर पोलिसांनी तपासाला सुरुवात केली. तसेच पोलिसांनी परमेशचा मृतदेह कबरीतून बाहेर काढून शवविच्छेदनासाठी पाठवला. जबाब नोंदवण्यास सुरुवात केली. या जबाबांदरम्यान, आशा आणि चंद्रप्पा यांच्या जबाबामध्ये परस्परविरोध दिसून आला.

पोलिसांकडून सतत सुरू असलेल्या चौकशीमुळे अखेर आशा आणि चंद्रप्पा यांचा धीर सुटला. तसेच दोघांनीही परमेश याच्या हत्येचा कट रचल्याचे मान्य केले. त्यांनी सांगितले की, परमेस आमच्या वाटेतला सर्वात मोठा अडसर ठरला होता. त्यामुळेच त्याला कायमचं रस्त्यातून हटवण्याची योजना आम्ही आखली, अशी कबुली त्यांनी दिली. आशा आणि चंद्रप्पा यांनी दोघांनी मिळून परमेशची हत्या केली. त्यांनी परमेशचं तोंड उशीने दाबलं आणि त्याची हत्या केली. त्यानंतर कुणालाही संशय येऊ नये म्हणून हृदयविकाराचा झटका येऊन परमेशचा मृत्यू झाल्याचा दावा केला. तसेच कुटुंबातील शोकाचं वातावरण पाहून कुणाला संशय येऊ नये म्हणून झटपट अंत्यसंस्कारही उरकले. मात्र अखेरीस त्यांचं पितळ उघडं पडलं.