झटपट पैसे कमावण्याची चटक लागली की अनेकांचा तोल ढळतो. त्यामधून अनेक जण वाममार्गाला लागतात. दरम्यान तेलंगाणामधील हैदराबाद येथून अशीच एक धक्कादायक घटना समोर आली आहे. येथे आर्थिक चणचणीमुळे त्रस्त असलेल्या एका जोडप्याने असं पाऊल उचललं, ज्याबाबत समजल्यावर पोलिसांनाही धक्का बसला. झटपट पैसे कमावण्याच्या हव्यासापोटी दोघेही गुन्हेगारीच्या मार्गाला लागले. पैसे कमावण्यासाठी या जोडप्याने जो मार्ग निवडला तो धक्कादायक होता आणि त्याचा शेवट आता पोलीस कोठडीत जाऊन झाला आहे.
हैदराबादमधील अंबरपेट परिसरातील मल्लिकार्जुननगर येथे राहणाऱ्या या जोडप्याने पैसे कमावण्यासाठी लाईव्ह सेक्स चॅट करण्याचा मार्ग निवडला. हे पती पत्नी याबदल्यात लोकांकडून दर पाच मिनिटांसाठी दोन हजार रुपये घ्यायचे. मात्र हळूहळू त्यांची पैशांची हाव एवढी वाढली की, या दोघांनीही व्हिडीओ तयार करून लोकांना ब्लॅकमेल करण्यास सुरुवात केली.
या आरोपी पती-पत्नीची ओळख नरेश आणि पल्लवी अशी पटली आहे. पोलिसांनी या जोडप्याला रंगेहात पकडले. त्यांच्या घरातून एचडी कॅमेरे, रेकॉर्डिंग डिव्हाईस आणि लाईव्ह स्ट्रिमिंग करणारी अनेक उपकरणे जप्त करण्यात आली.
पोलिसांनी केलेल्या चौकशीमध्ये आरोपी जोडप्याने पैशांची खूप गरज असल्याने आपण हे पाऊल उचलले असे सांगितले. नरेश हा ऑटो चालवायचा, मात्र तो बऱ्याच काळापासून आजारी होता. त्यामुळे त्याच्या तुटपुंज्या कमाईवर घर चालवणं कठीण बनलं होतं. तर या जोडप्याच्या दोन्ही मुली अभ्यासात खूप हुशार होत्या, त्यातील एक इंजिनियरिंगचं शिक्षण घेत आहे. तर दुसरीने बारावीमध्ये तब्बल ९९ टक्के गुण मिळवले आहेत. या मुलींच्या कॉलेजमधील फी आणि आपल्या औषधांचा खर्च भागवण्यासाठी या जोडप्याने हा मार्ग निवडला.
मोबाईल अॅपवर अशा गोष्टी केल्यास त्या माध्यमातून झटपट पैसे मिळू शकतात, असे या जोडप्याला वाटले. त्यामधून त्यांनी अश्लील चॅट आणि व्हिडीओंचा मार्ग निवडला. पोलिसांनी सांगितले की, आरोपी लाईव्ह व्हिडीओंसाठी दोन हजार रुपयांपर्यंत शुल्क आकारत असत. तसेच त्यांच्याकडून रेकॉर्ड करण्यात आलेली क्लिप ५०० रुपयांना विकली जात असे. या अॅपवरील बहुतांस ग्राहक हे तरुण होते. तसेच हे जोडपं आपली ओळख लपवण्यासाठी मास्क परिधान करत असत.
आता पोलिसांनी या जोडप्याविरोधात आयटी अॅक्टअन्वये गुन्हा दाखल केला आहे. आरोपी नरेश आणि पल्लवी यांना कोर्टात हजर करण्यात आलं असून, त्यांना १४ दिवसांची न्यायालयीन कोठडी सुनावण्यात आली. पोलिसांकडून या प्रकरणी पुढील तपास सुरू आहेत.