कोटामध्ये काळाचा घाला! २ मजली इमारत पत्त्यासारखी कोसळली; एका विद्यार्थ्याचा मृत्यू, ३०-४० जण ढिगाऱ्याखाली

या भीषण अपघातात ढिगाऱ्याखाली दबून 'एलन' कोचिंग इन्स्टिट्यूटमध्ये शिकणाऱ्या एका विद्यार्थ्याचा जागीच मृत्यू झाला आहे.

शिक्षणाचे माहेरघर मानल्या जाणाऱ्या कोटा शहरातून एक अत्यंत हृदयद्रावक घटना समोर आली आहे. शनिवारी रात्री जवाहर नगर परिसरातील इंदिरा विहारमध्ये एक निर्माणाधीन दोन मजली इमारत अचानक कोसळली. या भीषण अपघातात ढिगाऱ्याखाली दबून 'एलन' कोचिंग इन्स्टिट्यूटमध्ये शिकणाऱ्या एका विद्यार्थ्याचा जागीच मृत्यू झाला आहे. ढिगाऱ्याखाली अजूनही ३० ते ४० लोक अडकले असल्याची भीती व्यक्त केली जात असून, प्रशासनाकडून युद्धपातळीवर बचावकार्य राबवले जात आहे.

नेमका अपघात कसा झाला?

मिळालेल्या माहितीनुसार, शनिवारी रात्री ८:४५ च्या सुमारास ही दुर्घटना घडली. ज्या इमारतीचा हा अपघात झाला, तिचे बांधकाम सुरू होते. या इमारतीच्या तळमजल्यावर ‘दिल्ली नॉनव्हेज’ नावाचे एक लोकप्रिय रेस्टॉरंट होते. रात्रीच्या वेळी जेवणासाठी तिथे विद्यार्थ्यांची मोठी गर्दी होती. अचानक इमारत पत्त्यासारखी कोसळली आणि क्षणार्धात सर्व काही ढिगाऱ्याखाली गाडले गेले.

प्रशासनाचा उशिरा प्रतिसाद? स्थानिकांचा संताप

घटनेची माहिती मिळताच स्थानिक रहिवाशांनी मदतीसाठी धाव घेतली आणि ढिगाऱ्याखालून लोकांना बाहेर काढण्यास सुरुवात केली. मात्र, अग्निशमन दल आणि क्रेन पोहोचायला जवळपास दीड तास उशीर झाल्याचा आरोप स्थानिकांनी केला आहे. वेळेवर मदत मिळाली असती, तर ही हानी काही अंशी कमी झाली असती, असा संताप नागरिक व्यक्त करत आहेत. सध्या पोलीस अधिकारी, रुग्णवाहिका आणि फायर ब्रिगेडच्या अनेक टीम घटनास्थळी तैनात आहेत.

एका विद्यार्थ्याचा बळी, ८ जणांना वाचवण्यात यश

आतापर्यंत ढिगाऱ्याखालून ८ जणांना बाहेर काढून रुग्णालयात दाखल करण्यात आले आहे. दुर्दैवाने, यामध्ये एका निष्पाप विद्यार्थ्याचा मृत्यू झाला. उर्वरित जखमींची प्रकृतीही गंभीर असल्याचे सांगण्यात येत आहे. एका जखमी विद्यार्थ्याने दिलेल्या माहितीनुसार, "आम्ही रेस्टॉरंटमध्ये जेवायला गेलो होतो आणि काही कळायच्या आत वरून छत कोसळले. त्यावेळी आतमध्ये ३०-४० जण हजर होते."

बचावकार्यात अडथळे; वीज पुरवठा खंडित

सावधानतेचा उपाय म्हणून प्रशासनाने संपूर्ण परिसरातील वीज पुरवठा खंडित केला आहे. ढिगारा मोठा असल्याने आणि रात्रीची वेळ असल्याने बचावकार्यात अडथळे येत आहेत. या इमारतीचे बांधकाम सुरू असताना तिथे सुरक्षेचे नियम पाळले होते की नाही, याचा तपास आता पोलीस करत आहेत.