पाकचा ‘नशा’ उतरवला बोटीसह ६०० कोटींचे हेरॉइन जप्त

गुजरातच्या किनारपट्टीवरील आंतरराष्ट्रीय जलसीमेलगत भारतीय नौदल व तटरक्षक दलाने केलेल्या संयुक्त कारवाईमुळे कोट्यवधींची ‘नशा’ भारतात पाठविण्याचा पाकिस्तानी तस्करांचा कट सोमवारी उधळला गेला.

अहमदाबाद - गुजरातच्या किनारपट्टीवरील आंतरराष्ट्रीय जलसीमेलगत भारतीय नौदल व तटरक्षक दलाने केलेल्या संयुक्त कारवाईमुळे कोट्यवधींची ‘नशा’ भारतात पाठविण्याचा पाकिस्तानी तस्करांचा कट सोमवारी उधळला गेला. सीमावर्ती पंजाबला अमली पदार्थांच्या आहारी नेण्यासाठी नेटाने प्रयत्न करणाऱ्या पाकिस्तानमधून ६०० कोटी रुपये किमतीच्या अमली पदार्थांसह समुद्रामार्गे भारतात शिरलेली संशयित बोट या कारवाईत जप्त करण्यात आली़ शिवाय या बोटीवरील ८ पाकिस्तानी नागरिकांना ताब्यात घेण्यात आले. या आठही जणांची चौकशी नौदल, तटरक्षक दल आणि गुप्तचर संस्था संयुक्तरीत्या करणार असून त्यातून अशा आणखी काही कटांचा सुगावा लागण्याची शक्यता आहे. गेल्या ३१ डिसेंबरच्या उत्तररात्री स्फोटकांचा मोठा साठा घेऊन भारतात शिरू पाहणाऱ्या पाकिस्तानी नौकेचा तटरक्षकांनी यशस्वी पाठलाग केल्यानंतर त्यावरील संशयित दहशतवाद्यांनी आत्मघाती स्फोट घडवून आणला होता. परंतु यावेळी संशयित नौकेवरील सर्वच्या सर्व पाकिस्तानी हाती लागले आहेत.
गुप्तचरांनी दिलेल्या खात्रीलायक इशाऱ्याच्या आधारे नौदलाच्या व तटरक्षक दलाच्या विविध तुकड्या या कारवाईसाठी तैनात करण्यात आल्या होत्या. नौदलाच्या निर्घाट व कोंडुल, तसेच तटरक्षक दलाच्या संग्राम बोटीने कारवाईत भाग घेतला. पाकिस्तानातून गुजरातच्या सागरी हद्दीत शिरलेल्या संशयित नौकेचा माग घेण्यासाठी डॉर्नियर विमानांनी टेहळणी केली होती. मोठ्या प्रमाणावर अमली पदार्थ घेऊन आलेली एक बोट गुजरात किनाऱ्याजवळ सोमवारी पकडण्यात आली. आठ पाकिस्तानी नागरिक ही बोट चालवत असल्याचे आढळले, असे संरक्षण मंत्रालयातर्फे मंगळवारी प्रसिद्ध करण्यात आलेल्या निवेदनात म्हटले आहे.
या संशयित नौकेवरून अमली हेरॉईनचा जो साठा जप्त करण्यात आला, त्याची आंतरराष्ट्रीय बाजारपेठेतील किंमत ६०० कोटी रुपये असल्याचे निवेदनात नमूद केले आहे. अमली पदार्थांचा हा साठा एका बोटीवरून अन्य बोटींवर पाठविणे सोपे जावे, यासाठी
हे अमली पदार्थ दुसऱ्या बोटीपर्यंत पोहोचविण्यासाठी सॅटेलाईट फोन व जीपीएस तंत्राचा वापर करण्यात येत होता. ही यंत्रणाही जप्त करण्यात आली आहे. (वृत्तसंस्था)