वडगावचे २० तर नांद जलाशयाचे ६ दरवाजे उघडले

वडगावचे २० तर नांद जलाशयाचे ६ दरवाजे उघडले

व�

��गावचे २० तर नांद जलाशयाचे ६ दरवाजे उघडले
बेला : सर्वत्र झालेल्या मुसळधार पावसामुळे परिसरातील वडगाव जलाशय ९३ टक्के तर नांद जलाशयात १०० टक्के पाणी पातळी वाढली. या भागात बुधवारपासून सुरू असलेल्या पावसामुळे नदीनाले दुथडी भरून वाहत आहेत. बेला-उमरेड मार्ग गुरुवार सकाळपासूनच बंद होता. निम्न वेणा प्रकल्प वडगाव जलाशय ९३ टक्के भरल्याने सकाळी तीन गेट उघडण्यात आले तर दुपारी २ वाजेपर्यंत २१ पैकी १० गेट २५ सेमी ने तर १० गेट ५० सेमीने वर उचलण्यात आले. यात पाण्याचा साठा १२५.०४१ द.घ.ल.मी, ९३ टक्के, विसर्ग ७०२.२८ घ.मी.प्र.से. तर येवा ४४५ घ.न.मी.प्र.से. इतका आहे. धरणाची क्षमता १३४.८९६ द.ल.घ.मी एवढी आहे.
वडगाव जलाशयाला कार्यकारी अभियंता खापेकर यांनी भेट देऊन तेथील आढावा घेतला तर उपविभागीय अभियंता एच. पी. गहलोत व शाखा अभियंता व्ही. के. पाटील तसेच कर्मचारी परिस्थितीवर लक्ष ठेवून आहेत.
तसेच नांद जलाशयाचे सातपैकी सहा गेट एक मीटरने उचलण्यात आले. यात साठा २८७ म्हणजे १०० टक्के, विसर्ग ५८३ घ.मी.प्र.से. आहे. नांद जलाशयाची क्षमता ५३.१८ द.ल.घ.मी आहे.
नांद जलाशयातील पाणी नदीपात्रात सोडल्याने पिपरा गावात पाणी शिरले. त्यामुळे बेला-उमरेड मार्ग बंद होता. पुरामुळे पिपरा येथील मनोज तेलरांधे यांचा गोठा पूर्णत: कोसळला. मात्र यात कोणतीही जीवितहानी झाली नाही. मुसळधार पावसामुळे बेला परिसरातील वाहतूक विस्कळीत झाली होती. बेला-सोनेगाव, बेला-समुद्रपूर व बेला-उमरेड मार्ग बंद पडल्याने वाहतुकीची कोंडी झाली. नांद व वेणा नदी तसेच परिसरातील नाल्यांना आलेल्या पुरामुळे अनेकांची पिके वाहून जाण्याचा धोका निर्माण झाला आहे.