एका ५९ वर्षीय व्यावसायिकाचा गर्लफ्रेंडला चॉकलेट भरवतानाचा व्हिडीओ सीसीटीव्ही फुटेजमधून रेकॉर्ड करून दुकानदाराने त्याला ब्लॅकमेल केल्याचा धक्कादायक प्रकार गुजरातमधील जामनगर येथे उघडकीस आला आहे. येथील एक ५९ वर्षीय व्यावसायिक त्याच्या गर्लफ्रेंडला घेऊन ड्रायफ्रूट्सच्या दुकानात गेला होता. तिथे त्याने गर्लफ्रेंडला चॉकलेट भरवलं. हे दृष्य दुकानातील सीसीटीव्ही कॅमेऱ्यात कैद झालं. त्यानंतर याचा व्हिडीओ चित्रित करून घेत दुकानदार आणि त्याच्या सहकाऱ्याने या व्यावसायिकाला ब्लॅकमेल करण्यास सुरुवात केली. तसेच पहिल्यांदा त्याच्याकडून ५० हजार रुपये उकळले. त्यानंतर पुन्हा एकदा पैशांची मागणी केली. मात्र हे पैसे न दिल्याने या दुकानदाराने हा व्हिडीओ सोशल मीडियावर व्हायरल केला. त्यानंतर प्रकरण पोलिसांपर्यंत पोहोचले. तसेच पोलिसांनी तातडीने कारवाई करत आरोपी दुकानदार आणि त्याच्या सहकाऱ्याला अटक केली आहे.
याबाबत मिळालेल्या अधिक माहितीनुसार ही घटना जामनगरमधील सुभााष मार्केट परिसरातील आहे. येथे एक व्यावसायिक त्याच्या मैत्रिणीसोबत खरेदी करण्यासाठी आला होता. त्यावेळी त्यांनी एकमेकांना चॉकलेट भरवली. हे दृश्य दुकानातील सीसीटीव्हीमध्ये चित्रित झाले होते. तसेच त्यालाच हत्यार बनवून दुकानदार अब्दुल सत्तार उर्फ अबू कसम लखानी आणि त्याचा सहकारी समीर रावकरदा यांनी या व्यावसायिकाला ब्लॅकमेल करण्यास सुरुवात केली.
त्यांनी व्हिडीओ व्हायरल करण्याची धमकी देत त्यांच्याकडूव ५० हजार रुपये उकळले. त्यानंतर पुन्हा पैशांची मागणी केली. यावेळी त्यांनी एक लाख रुपये मागितले. मात्र ही रक्कम त्यांना मिळाली नाही. त्यामुळे त्यांनी हा व्हिडीओ सोशल मीडियावर व्हायरल केला. या प्रकारामुळे सदर व्यावसायिकाला बदनामीला सामोरं जावं लागलं. अखेरीस या व्यावसायिकाने दिलेल्या तक्रारीच्या आधारावर पोलिसांनी आरोपी दुकानदाराला अटक केली. आता या प्रकरणाचा पुढील तपास पोलिसांकडून सुरू आहे.