Air India Plane: अहमदाबादमध्ये झालेल्या विमान अपघातानंतर एअर इंडियाच्या विमानांबाबत अनेक तक्रारी समोर येत आहेत. अशातच लंडनहून मुंबईला येणाऱ्या एअर इंडियाच्या बोईंग विमानात काही प्रवाशांची आणि क्रू मेंबर्सची प्रकृती अचानक बिघडली. मुंबई विमानतळावर उतरल्यानंतर सर्वांना त्यांची तपासणी करण्यात आली आणि त्यांना सोडून दिलं. या सगळ्या प्रकारामुळे प्रवाशांमध्ये आता भीतीचे वातावरण निर्माण झालं आहे. प्रवाशांची तब्येत बिघडल्यानंतरही बोईंग ७७७ विमानाने आपला प्रवास सुरू ठेवला आणि ते मुंबईत सुरक्षितपणे उतरले.
लंडनच्या हीथ्रो विमानतळावरून मुंबईला येणाऱ्या एअर इंडियाच्या एआय १३० विमानामध्ये प्रवासादरम्यान, पाच प्रवाशांनी आणि दोन क्रू मेंबर्सनी चक्कर येणे आणि उलट्या होत असल्याची तक्रार केली होती. एअर इंडियाने सोमवारी ही माहिती दिली. विमान मुंबईत सुरक्षितपणे उतरले तेव्हा वैद्यकीय पथक आधीच तयार असल्याचे एअर इंडियाने सांगितले. मुंबईत पोहोचल्यानंतर, दोन प्रवाशांना आणि दोन क्रू मेंबर्सना मेडिकल रूममध्ये नेण्यात आले जिथे त्यांची तपासणी करण्यात आली. नंतर सर्वांना डिस्चार्ज देण्यात आला. या प्रकरणाची चौकशी सुरू आहे आणि तपास यंत्रणेला माहिती देण्यात आली आहे, अशी माहिती एअर इंडियाच्या प्रवक्त्यांनी दिली.
"विमान मुंबईत सुरक्षितपणे उतरले आहे. आमच्या वैद्यकीय पथकाने प्रवाशांना आणि क्रू मेंबर्सना तात्काळ मदत केली. लँडिंगनंतरही २ प्रवासी आणि २ क्रू मेंबर्सना अस्वस्थ वाटत होते. त्यांना मेडिकल रूममध्ये नेण्यात आले. उपचारानंतर त्यांना डिस्चार्ज देण्यात आला आहे. आम्ही घटनेची चौकशी करत आहोत," असं एअर इंडियाकडून सांगण्यात आले.
दरम्यान, सोमवारी, एअर इंडिया एक्सप्रेसचे दिल्ली-जम्मू-श्रीनगर विमान जम्मू विमानतळावर न उतरताच दिल्लीला परतले. विमान सकाळी १०:४० वाजता निघणार होते. पण विमानाने सकाळी ११:०४ वाजता उड्डाण केले होते आणि दुपारी १२:०५ वाजता जम्मूला पोहोचणार होते. मात्र उड्डाणादरम्यान संशयास्पद जीपीएस समस्येमुळे विमान परत आणण्यात आले आणि दिल्लीत सुरक्षितपणे उतरवण्यात आले, असं अधिकाऱ्यांनी सांगितले.
दुसरीकडे, एअर इंडिया एक्सप्रेसच्या जयपूर ते दुबई या विमानात उड्डाण करण्यापूर्वी कॉकपिटमध्ये तांत्रिक बिघाड झाला. त्यानंतर, पायलटने विमान धावपट्टीवरून पुन्हा विमानतळाकडे आणले. विमानात १३० प्रवासी होते. ५ तास विमान दुरुस्त करण्याचे प्रयत्न सुरू राहिले. तरीही यश आले नाही. त्यानंतर, दुबईला जाणारे हे विमान रद्द करण्याचा निर्णय घेण्यात आला.