मंगळ मोहिमेसाठी ४४ भारतीयांची निवड

लंडन, दि. ८ - मंगळावर वस्ती वसवण्याच्या 'मार्सवन' या संस्थेच्या २०२४ साली होणा-या मोहिमेसाठी इच्छुक असणा-यांपैकी ४४ भारतीयांची निवड करण्यात आली आहे. या मोहिमेसाठी इच्छुक असणा-या तब्बल ७०५ उमेदवारांना निवडण्यात आले असून त्यात २७ पुरुष व १७ महिलांचा समावेश आहे. यापैकी अवघ्या चार जणांनाच या मोहिमेवर पाठवण्यात येईल.

नेदरलँडस्थित मार्सवन या संस्थेने या मोहिमेकरता डिसेंबर २०१३ साली या संबंधी अर्ज मागवले होते. या उपक्रमासाठी तब्बल १४० हून अधिक देशांतून अर्ज आले असून, २० हजार भारतीयांनी अर्ज केले होते. त्यापैकी ६२ अर्ज ग्राह्य धरण्यात आले होते. त्यातून निवडक उमेदवारांना पुढील चाचणीसाठी बोलवण्यात आले. नवी दिल्ली, मुंबई, हैदराबाद, कोलकाता, पुणे आणि तिरअनंतपुरम येथून अनेकांनी अर्ज पाठवले. 

या मोहिमेअंतर्गत निवड झालेल्या उमेदवारांना मंगळावर राहावे लागणार असून त्यांना तेथे पाठवण्याचा खर्च 'मार्स वन' ही संस्था करणार आहे. अशा प्रकारची ही पहिलीच मोहिम असून या मोहिमे करता मार्च २०१४ पर्यंत उमेदवारांनी मेडिकल हेल्थ सर्टिफिकेट सादर करणे तसेच लोकांसाठी ऑन-लाईन मार्स वन अ‍ॅप्लीकन्ट प्रोफाइल बनवणे अशा दोन टास्क्स पूर्ण करण्याची अट संस्थेने घातली होती. ४१८ पुरूष व २८७ महिलांनी या दोन्ही टास्क्स यशस्वीरित्या पूर्ण केल्या असून त्यांचा पर्सनल इंटरव्ह्यू घेण्यात येणार आहे. या उमेदवारांपैकी ३१३ उमेदवार अमेरिका, १८७ युरोपमधून, १३६ आशिया येथून, ४१ आफ्रिकेतून व २८ जण ओशेनिया येथून आहेत. 

'या मोहिमेच्या दुस-या टप्प्यासाठी उत्सुक असून, त्यासाठी शारीरिक व मानसिकदृष्ट्या सक्षम असलेल्या उमेदवारांची आम्ही निवड करणार आहोत, असे या मोहिमेचे वैद्यकिय अधिकारी नोरबर्ट क्राफ्ट यांनी असे सांगितले.