मुंबई - सर्वांनाच नव्या वर्षाची चाहूल लागली आहे. 2018 ची सकाळ उघडण्यासाठी काही तासं शिल्लक राहिले आहेत. अशामध्ये प्रत्येकजण आपण वर्षभर काय केलं आणि काय करायला नको होतं. याचं विश्लेषण करत असणार... अशात एकदा 2017ने आपल्याला काय-काय दिले? याचा विचार करायला हवा. या वर्षात अशा अनेक घटना घडल्या ज्यामुळे भारताची मान जगात उंचावली. मानुषी छिल्लर, बाहुबली, तिहेरी तलाकबद्दलचा सर्वोच्च न्यायालयाचा निर्णय, अशा अनेक घटनांकडे आपण पाहू शकतो. याबाबत सविस्तर जाणून घेऊयात...
- मिस वर्ल्ड किताब : हरयाणाच्या मानुषी छिल्लर या तरुणीने मिस वर्ल्डचा किताब पटकावला. भारताकडे हा मान 17 वर्षांनी परत आला. 20 वर्षांची मानुषी मेडिकलची विद्यार्थिनी आहे. मिस वर्ल्डचा किताब जिंकणारी ती सहावी भारतीय तरुणी आहे.
- इस्रोची गगनभरारी : भारताची अंतराळ संशोधन संस्था Indian Space Research Organization (ISRO)ने यंदा एका दिवसात तब्बल 104 उपग्रह अंतराळात सोडत इतिहास घडवला. आंध्र प्रदेशमधल्या श्रीहरीकोटाच्या सतीश धवन स्पेस सेंटर मधून 15 फेब्रुवारी 2017ला हे 104 उपग्रह घेऊन एक रॉकेट आकाशात झेपावले. यापैकी 3 उपग्रह भारताचे होते, तर उर्वरित 101 उपग्रह अमेरिका, नेदरलँड, स्वित्झर्लंड, इस्राईल, कझाकस्तान आणि UAE या देशांचे होते.
- ’बाहुबली, दंगलने'ने गाजवले : भारतासाठी 2017 हे वर्ष दोन ब्लॉकबस्टर चित्रपटांनी गाजवले. एक दंगल आणि दुसरा बाहुबली. दंगलने हा चित्रपट (2000 कोटी) जगभरात नावाजला गेला. त्या खालोखाल एस. राजमौली यांच्या 'बाहुबली'ने भारतातले बॉक्स ऑफिसचे सगळे विक्रम मोडीत काढले. या चित्रपटाने एकट्या भारतात 1400 कोटी रुपयांचा गल्ला जमवला.
- नौदलात महिलांचा समावेश : भारतीय नौदलात पायलट म्हणून नियुक्ती होणाऱ्या शुभांगी स्वरूप या पहिल्या महिला अधिकारी आहेत. मूळच्या उत्तर प्रदेशच्या असलेल्या शुभांगी 'मॅरिटाइम रेकनन्स एअरक्राफ्ट' चे सारथ्य करतील. याव्यतिरिक्त नौदलाची उपशाखा असणाऱ्या 'नेव्हल आर्मामेंट इन्स्पेक्टरेट' विभागात पहिल्यांदाच तीन महिला अधिकाऱ्यांची नियुक्ती झाली आहे.
- क्रीडा जगतात अव्वल : या वर्षात भारताने कसोटी आणि एकदिवसीय अशा दोन्ही प्रकारांमध्ये ICCच्या क्रमवारीत अव्वल स्थान पटकावले. एकाच वेळी दोन्ही प्रकारांमध्ये अव्वल स्थान पटकावण्याची ही भारताची पहिली वेळ आहे. अंधांसाठी असलेला T20 वर्ल्डकप यंदा भारतीय टीमने जिंकला. भारताच्या किदांबी श्रीकांतने बॅडमिंटनमध्ये एका वर्षात चार सुपर सिरीज (इंडोनेशिया, ऑस्ट्रेलिया, डेन्मार्क आणि फ्रान्स) जिंकण्याचा पराक्रम करत इतिहास घडवला.
- फिफा स्पर्धा भारतात : क्रिकेटवेड्या भारतात अंडर-17 फिफा वर्ल्डकप रंगला आणि देशभरात तब्बल 13.5 लाख लोकांनी या वर्ल्डकपचा आनंद लुटला. भारताला या फुटबॉल वर्ल्डकपमध्ये काहीच जिंकता आले नसले तरी, केवळ यजमानपद मिळाल्याने भारतीय तरुणाईचा आनंद गगनात मावेनासा झाला.
- तिहेरी तलाक : भारतातल्या मुस्लीम महिलांना दिलासा देणारा एक निर्णय ऑगस्ट 2017मध्ये सुप्रीम कोर्टाने दिला. सुप्रीम कोर्टाच्या पाच पैकी तीन न्यायमूर्तींनी मुस्लीम समाजात प्रचलित असलेली तिहेरी तलाकची पद्धत घटनाबाह्य असल्याचा निर्णय दिला. तिहेरी तलाकला गुन्हा ठरवणारे विधेयक केंद्रीय न्यायमंत्री रवीशंकर प्रसाद यांनी 28 डिसेंबर 2017 रोजी संसदेत मांडले आणि लोकसभेने पास करत ते विधेयक आता राज्यसभेत मांडण्यात येणार आहे.
- ट्रान्सजेंडरचे सक्षमीकरण : पश्चिम बंगालच्या ज्योइता मोंडल यांची भारतातल्या पहिल्या ट्रान्सजेंडर न्यायाधीश म्हणून नियुक्ती झाली. तामिळनाडूच्या प्रीतिका अश्नी यांनी 'तामिळनाडू युनिफॉर्म सर्व्हिसेस रिक्रूटमेंट बोर्ड'च्या निर्णयाला कोर्टात आव्हान दिले होते. त्यानंतर त्या पहिल्या पोलीस उपनिरीक्षक बनल्या. तसेच भारतात पहिल्यांदाच कोचीच्या मेट्रोमध्ये 23 ट्रान्सजेंडरना एकाच वेळी नोकरी देण्यात आली.