वैशाली झनकर यांचा ‘वीक-एण्ड’ कारागृहातच

नाशिक : शिक्षणसंस्थांच्या शाळांना मंजूर झालेल्या वीस टक्के अनुदानानुसार वेतन सुरू करण्याचा कार्यादेश काढण्यासाठी आठ लाखांची लाच स्वीकारताना सापडलेल्या संशयित माध्यमिक शिक्षणाधिकारी डॉ. वैशाली झनकर प्रकरणाची सुनावणी सोमवारपर्यंत पुढे ढकलण्यात आल्याने झनकर यांचा कारागृहातील मुक्काम आणखी दोन दिवसांसाठी वाढला आहे.

शिक्षकाच्या वेतन कार्यादेश मान्यता प्रकरणात माध्यमिक शिक्षणाधिकारी डॉ. वैशाली झनकर यांच्यासह साथीदार शिक्षक पंकज दशपुते व चालक ज्ञानेश्वर येवले यांना लाचलुचपत प्रतिबंधक विभागाच्या ठाणे पथकाने पकडले होते. या प्रकरणात न्यायालयाने बुधवारी झनकर यांचे साथीदार शिक्षक पंकज दशपुते व चालक ज्ञानेश्वर येवले यांना जामीन मंजूर केला असून त्यांची कारागृहातून सुटका झाली आहे. तर झनकर यांच्या जामीन अर्जावर शुक्रवारी सुनावणी होणार होती; परंतु ही सुनावणी सोमवारपर्यंत पुढे ढकलण्यात आली आहे. त्यामुळे झनकर यांना आणखी दोन दिवस जामिनासाठी प्रतीक्षा करावी लागणार आहे. दरम्यान, डॉ. वैशाली झनकर यांच्याविरोधात लाचप्रकरणी गुन्हा दाखल होऊन त्यांची प्रथम पोलीस कोठडी अन् नंतर न्यायालयीन कोठडीत रवानगी करण्यात आल्याने शिक्षण उपसंचालक नितीन उपासनी यांनी त्यांच्या निलंबनाचा अहवाल शासनाला पाठविला आहे; परंतु जवळपास आठवडाभराचा कालावधी उलटूनही शासनाकडून अद्याप झनकर यांच्यावर कोणतीही कारवाई झालेली नाही. विशेष म्हणजे शिक्षण उपसंचालकांनी प्राथमिक अहवालानंतर एक स्वतंत्र पत्र पाठविले आहे. त्यानंतर अद्ययावत अहवाल सादर करताना कारवाईत होणाऱ्या दिरंगाईमुळे शिक्षण विभागाची प्रतिमा मलिन होत असल्याचेही अहवालात नमूद करण्यात आल्यानंतरही झनकर यांंच्यावर अद्याप कारवाई झालेली नाही. त्यामुळे डॉ. वैशाली झनकर प्रकरणात शासनाच्या भूमिकेकडे संपूर्ण शैक्षणिक वर्तुळाचे लक्ष लागले आहे.