तरुणाईकडून गरब्याचा सराव

वेध नवरात्रीचे : गरब्याचे प्रशिक्षण देणाऱ्या कार्यशाळांना गर्दी

नाशिक : चार दिवसांवर नवरात्रोत्सवाचा सण येऊन ठेपला असून, तरुणाईला गरब्याचे वेध लागले आहे. शहरात विविध भागांमध्ये गरब्याचे क्लास रंगात येत असून, सरावावर तरुण-तरुणी भर देत आहेत.
नवरात्रोत्सवामध्ये दांडिया रास आणि गरबा हे नृत्यप्रकार लोकप्रिय आहेत. कॉलेजरोड, गंगापूररोड, हिरावाडी, पंचवटी, आडगाव नाका, इंदिरानगर, अशोकामार्ग, उपनगर या भागांमध्ये गरबाचे खासगी वर्ग सुरू झाले आहेत. गरबा हा जसा तरुणींमध्ये प्रसिद्ध आहे तसा तरुणांमध्येही आहे. गुजराथी, राजस्थानी, जैन बांधव शहरात नवरात्रोत्सवामध्ये गरब्याचे आयोजन करतात. सालाबादप्रमाणे दिंडोरी नाका येथील कच्छी लोहाना महाजनवाडीमध्ये यंदाही सामूहिक गरबा स्पर्धा रंगणार आहे. या स्पर्धेत शहरातील विविध भागांमधील गुजराथी तरुण-तरुणी मोठ्या संख्येने सहभागी होतात.
गरब्यासाठी लागणारा पोशाखही बाजारात विक्रीसाठी उपलब्ध झाला आहे. तरुणदेखील पारंपरिक पोषाख म्हणून केडियूला प्राधान्य देत आहेत. गुजरात, राजस्थान या राज्यांमधील लोकनृत्य म्हणून गरबा ओळखला जातो. नवरात्रोत्सवाचे खास आकर्षण म्हणून दांडिया रास व गरबा या सांस्कृतिक कार्यक्रमांची ओळख आहे.
शहरात गरब्याची कार्यशाळा ठिकठिकाणी गेल्या आठवडाभरापासून सुरू असून, येत्या तीन दिवसांमध्ये कार्यशाळांचा समारोप होणार आहे. वर्षातून एकादाच हा नृत्यप्रकार तरुणाईकडून केला जात असल्याने कार्यशाळांमध्ये पंधरा ते पंचवीस वयोगटातील तरुण-तरुणींची गर्दी होत आहे. तसेच बहुतांश कार्यशाळांमध्ये महिलांनीही सहभाग नोंदविला आहे.