वडबारे येथे दोन वृध्द महिलांना अज्ञात व्यक्तीकडून जबर मारहाण

चांदवड : तालुक्यातील वडबारे येथे अंगणात झोपलेल्या दोन वृद्ध महिलांवर अज्ञात व्यक्तीने तीक्ष्ण हत्याराने वार करून जीवे ठार करण्याचा प्रयत्न झाला. येथील आदिवासी वस्तीवर २५ जुलैच्या पहाटे ही घटना घडली. यात दोन्ही महिला गंभीर जखमी झाल्या आहेत. याबाबत लखन रमेश माळी, रा. वडबारे यांनी चांदवड पोलीस ठाण्यात दिलेल्या फिर्यादीत म्हटले आहे की, अज्ञात व्यक्तीने कोणत्यातरी हत्याराने आई सुशीलाबाई माळी व चुलत आजी लंकाबाई बाळू माळी यांच्या मानेवर, गळ्यावर, डोक्यावर व कानाजवळ तीक्ष्ण हत्याराने वार करून जीवे मारण्याचा प्रयत्न केला.गंभीर जखमी झालेल्या महिलांना तातडीने चांदवड उपजिल्हा रुग्णालयात दाखल करण्यात आले. तेथून पुढील उपचारासाठी नाशिककडे रवाना करण्यात आले आहे. चांदवड पोलीस ठाण्यात गुन्हा दाखल झाला आहे. घटनेची माहिती मिळताच निफाड विभागाचे उपविभागीय पोलीस उपअधीक्षक पडीले यांनी घटनास्थळी भेट देऊन माहिती घेतली. अधिक तपास पोलीस निरीक्षक संजय पाटील यांच्या मार्गदर्शनाखाली पोलीस उपनिरीक्षक राठोड हे करीत आहेत.