वर्षा लहाडे यांना तीन दिवसांची पोलीस कोठडी : बेकायदेशीर गर्भपात प्रकरण

जिल्हा रुग्णालयातील बेकायदेशीर गर्भपात प्रकरणात गुन्हा दाखल असलेल्या जिल्हा रुग्णालयातील स्त्रीरोगतज्ज्ञ डॉ़ वर्षा लहाडे

लोकमत न्यूज नेटवर्क
नाशिक : जिल्हा रुग्णालयातील बेकायदेशीर गर्भपात प्रकरणात गुन्हा दाखल असलेल्या जिल्हा रुग्णालयातील स्त्रीरोगतज्ज्ञ डॉ़ वर्षा लहाडे यांचा म्हसरूळ पोलिसांनी मंगळवारी (दि़९) ताबा घेतला़ लहाडे यांना न्यायालयात हजर केले असता १२ मे पर्यंत पोलीस कोठडी सुनावण्यात आली़ दरम्यान, सोनोग्राफी मशीन, गर्भपाताची औषधे याचा शोध घेण्याचे आव्हान पोलिसांसमोर आहे़
डॉ. वर्षा लहाडे व प्रशिक्षणार्थी डॉ. कमलाकर जाधव यांनी पिंपळगाव बसवंतजवळील उंबरखेड येथील २४ आठवड्यांच्या गर्भवती महिलेचा जिल्हा शासकीय रुग्णालयात मार्च महिन्यात बेकायदेशीरपणे गर्भपात केला़ याप्रकरणी सरकारवाडा पोलीस ठाण्यात एमटीपी तर म्हसरूळ पोलीस ठाण्यात शासकीय नोकरीत असतानाही विनानोंदणी दवाखाना सुरू केल्याबद्दल गुन्हा दाखल आहे़ लहाडे यांनी प्रारंभ अटकपूर्व जामिनासाठी जिल्हा न्यायालयात अर्ज केला, मात्र सुनावणीदरम्यान अर्ज मागे घेत २८ एप्रिल रोजी त्या सरकारवाडा पोलिसांना शरण आल्या़
प्रथम वर्ग न्यायालयाने २९ एप्रिल ते ६ मे या कालावधीत त्यांना पोलीस कोठडी सुनावली़ पोलीस कोठडीच्या कालावधीत पोलिसांनी डॉ़ लहाडे यांच्या खासगी प्रयाग हॉस्पिटलची चौकशी तसेच गर्भपात केलेल्या अर्भकाचा मृतदेह उकरून त्याचे शवविच्छेदन केले़ पोलीस कोठडीची मुदत संपल्याने लहाडे यांना शनिवारी (दि.६) न्यायालयात नेले असता न्यायालयीन कोठडी सुनावण्यात आली़ तर म्हसरूळ पोलीस ठाण्यात दाखल गुन्ह्यात न्यायालयाकडून म्हसरूळ पोलिसांनी मंगळवारी ताबा घेतला़ त्यांना न्यायालयात हजर केले असता तीन दिवसांची पोलीस कोठडी सुनावण्यात आली़