शिक्षकांनो, लसीकरण करून घ्या, पाच सप्टेंबरची डेडलाइन !

नाशिक : कोरोना संसर्गाचा प्रादुर्भाव आता ओसरत असला तरी कोरोनाचा धोका मात्र अद्यापही टळलेला नाही. केरळ व महाराष्ट्रात अद्यापही कोरोना रुग्ण आढळून येत आहेत. कोरोनाचा प्रभाव कमी होत असल्यामुळे शासन आता प्राथमिक शाळा सुरू करण्याचा विचार करीत आहे. त्यामुळे शासनाने कोरोना लस घेण्यासाठी शिक्षकांसह शिक्षकेतर कर्मचाऱ्यांनाही ५ सप्टेंबरपर्यंतची डेडलाइन दिली आहे.

कोरोनाचा प्रादुर्भाव कमी झाल्यामुळे शासनाने प्रथम आठवी ते बारावीपर्यंतच्या शाळा सुरू करण्यास परवानगी दिली. नाशिक महापालिका क्षेत्र वगळता जिल्ह्यात अपवाद वगळता ७० ते ८० टक्के शाळा, कनिष्ठ महाविद्यालये सुरू झाली आहेत. शाळा, महाविद्यालयांमध्ये रुजू होताना, शिक्षण विभागाने शिक्षक आणि शिक्षकेतर कर्मचाऱ्यांना कोरोना चाचणीसह कोरोना लसीकरण बंधनकारक केले आहे. परंतु, अद्यापही शेकडो शिक्षकांनी कोरोना लसीकरण करून घेतलेले नाही. लसीकरणाबाबत शिक्षकांच्या मनातही काही गैरसमज पसरलेले असल्यामुळे अनेकांनी कोरोनाची लस घेतली नाही. काहींनी वेळकाढू धोरण स्वीकारल्यामुळे लस घेतली नाही. परंतु, आता राज्य शासनाने शिक्षकांसह शिक्षकेतर कर्मचाऱ्यांना कोरोना लसींचे दोन्ही डोस घेण्याची सक्ती करीत, ५ सप्टेंबर शिक्षक दिनापर्यंत डेडलाइन दिली आहे. तसे आदेशच शिक्षणाधिकाऱ्यांना दिले असून, शिक्षणाधिकाऱ्यांनीही संबंधित शाळांना तसे आदेश दिले आहेत.

--

बहूतांश शिक्षकांचे झाले लसीकरण

शिक्षकांचे जवळपास ७० ते ८० टक्के लसीकरण झालेले आहे. उर्वरित शिक्षकांसाठी विशेष लसीकरण शिबिराचे आयोजन केल्यास सर्वच शिक्षकांचे लसीकरण पूर्ण होऊन लवकरच शाळाही सुरू होऊ शकतील. पालकांनी आपले लसीकरण करून घेणे आवश्यक आहे. त्यामुळे विद्यार्थ्यांची सुरक्षितता आणखीनच वाढण्यास मदत होईल.

- नंदलाल धांडे, अध्यक्ष, खासगी प्राथमिक शिक्षक संघ

---

मनपा शिक्षणाधिकारी कार्यालयाने पत्रक काढून शिक्षकांना लसीकरण करून घेण्याच्या सूचना केल्या आहेत. त्यानुसार शहरातील ९० टक्के शिक्षकांचे लसीकरण झाले असून, जिल्ह्यात हे प्रमाण ८० टक्क्यांपर्यंत आहे. काही शिक्षकांचे वैद्यकीय कारणांनी लसीकरण राहिले असले तरी तेही लवकरच पूर्ण होईल अशी आशा आहे.

-नीलेश ठाकूर, राज्य समन्वयक माध्यमिक शिक्षक संघ

---

आतापर्यंत झालेले लसीकरण

जिल्ह्यातील बहूतांश शिक्षकांचे लसीकरण झालेले आहे. जवळपास ८० ते ९० टक्के शिक्षकांनी लसीचा पहिला व दुसरा डोस असे दोन्ही डोस घेतले आहेत. परंतु, शिक्षण विभाग अथवा आरोग्य खात्याकडे शिक्षकांच्या लसीकरणाची वेगळी नोंद नसल्याने नेमके किती शिक्षकांचे लसीकरण झाले याचा खात्रीशीर आकडा उपलब्ध होऊ शकत नाही. त्यासाठी शिक्षण विभागाने जिल्ह्यातील विविध शाळांकडून किती शिक्षकांचे लसीकरण झाले आहे. यात पहिला व दुसरा डोस घेणारे शिक्षक किती याविषयी माहिती मागवली आहे.

बहूतांश शिक्षकांचे लसीकरण झाले आहे. परंतु, नेमक्या किती शिक्षकांनी दोन्ही डोस घेतले व कितींनी केवळ पहिला डोस घेतला याविषयी माहिती उपलब्ध नाही. ही माहिती शिक्षण विभागाकडून घ्यावी लागेल.

- रवींद्र चौधरी, जिल्हा व बाल संगोपन अधिकारी, जिल्हा परिषद