परधाडीत विद्यार्थी अद्यापही गणवेशाच्या प्रतीक्षेत

न्यायडोंगरी : नांदगाव तालुक्यातील परधाडी येथील प्राथमिक शाळेत २८३ विद्यार्थ्यांना पाच दिवस उलटले तरी अद्याप गणवेश वाटप करण्यात आला नाही.

न्यायडोंगरी : राज्यभरात जिल्हा परिषदेच्या प्राथमिक शाळेत शाळेच्या पहिल्याच दिवशी विद्यार्थ्यांच्या स्वागताचा मोठा गाजावाजा करीत नांदगाव तालुक्यातील परधाडी येथील प्राथमिक शाळेत २८३ विद्यार्थ्यांना पाच दिवस उलटले तरी अद्याप एकाही विद्यार्थ्यास गणवेश वाटप करण्यात आला नाही. अनेक पालकांनी आमच्या प्रतिनिधीस भेटून नाराजी व्यक्त करीत परधाडी गावासाठी दुजाभाव का? असा सवाल ही केला गेला. याबाबत शाळेचे मुख्याध्यापक एस. आर. गडकर यांच्याशी संपर्क साधला असता गणवेश वाटप केले गेले नाही याची कबुली देत लवकरच वाटप करण्यात येईल, असा खुलासा केला. विद्यार्थ्यांना फक्त पॅन्ट द्यावयाची असल्याने गणवेश शिवून मिळण्यास उशीर झाला असून, त्यामुळेच वेळेत वाटप होऊ शकले नाही. असे स्पष्ट केले. परंतु केंद्रप्रमुख देवरे यांच्याशी चर्चा केली असता प्रत्येक शाळेतील विद्यार्थ्यांना पहिल्याच दिवशी गणवेश मिळावे म्हणून मे महिन्यातच प्रत्येक मुख्याध्यापकाकडे आर्थिक तरतूद करून देण्यात आलेली होती. असे असतानाही दिरंगाई का या पाठीमागे गूढ काय? असा सवाल उपस्थित केला जात आहे. (वार्ताहर)