१६ ठिकाणी स्मार्ट पार्किंग आठवडाभरात सुरू होणार

नाशिक- शहरातील वाहतुकीचा प्रश्न सोडवण्यासाठी स्मार्ट सिटी कंपनीच्या वतीने शहरात राबवण्यात येणाऱ्या स्मार्ट पार्किंगचा रखडलेला प्रकल्प येत्या आठवडाभरात सुरू होणार असून २८ ऑन स्ट्रीट पार्किंग पैकी १६ ठिकाणी ही सेवा सुरू हेाणार असल्याचे कंपनीच्या सूत्रांनी दिली. अर्थात, महापालिकेतील नगरसेवकांनी घेतलेल्या आक्षेपाचे निराकरण काय झाले हे मात्र अनुत्तरीत आहे.

नाशिक शहरात वाहतुकीची समस्या वाढत आहे. विशेषत: रस्त्यात अस्ताव्यस्त उभ्या राहणाऱ्या वाहनांना शिस्त लागावी आणि रहदारीला अडथळा ठरू नये यासाठी महापालिकेच्या स्मार्ट सिटी कंपनीने बीओटी तत्त्वावर स्मार्ट पार्किंग राबवण्याचा निर्णय घेतला. त्यासाठी २८ ऑन स्ट्रीट म्हणजेच रस्त्याच्या कडेला तर पाच ठिकाणी मेाकळ्या मैदानात पार्किंग करण्याचा निर्णय घेतला. त्यासाठी खासगी भागीदारासाठी निमंत्रित करण्यात आले होते. त्यानुसार २२ ठिकाणे संबंधित ठेकेदाराने तयार केली असून त्यातील १६ रस्त्यांवर वसुलीसाठी कंपनीला परवानगी मिळाली असल्याने आता लवकरच वसुली करण्यात येणार आहे. त्यामुळे आता टोईंग पाठोपाठ स्मार्ट पार्किंग सुरू होणार असल्याने वाहतुकीला शिस्त लागण्याची शक्यता असल्याचे कंपनीच्या सूत्रांनी सांगितले.

नाशिकमध्ये यापूर्वीच स्मार्ट सिटी कंपनीने ठेकेदार कंपनीला वसुलीसाठी एक वर्ष ३ महिने मुदतवाढ देण्यात आली आहे. कंपनी दहा वर्षे स्मार्ट पार्किंगचा ठेका चालवणार आहे. कोरोनामुळे एक वर्ष वाया गेल्याने ही मुदतवाढ देण्यात आली आहे.

इन्फो...

दुचाकीला पाच तर मोटारीला दहा रुपये

नाशिक शहरात सुरू होणाऱ्या स्मार्ट पार्किंगचे दर देखील निश्चित झाले असून दुचाकीला पाच रुपये तर चारचाकी मोटारीला दहा रुपये असे दर निश्चित करण्यात आले आहेत. यापूर्वी चाचणी स्तरावर कंपनीने सर्वेक्षण केले तेव्हा १९ दिवसात दीड लाख रुपये वसूल करण्यात आले आहेत.