पाथर्डी गौळाणे रस्त्यावर परवानगीशिवाय रंगला विवाहसोहळा

इंदिरानगर : नाशिक शहरात कोरोनाच्या पार्श्वभूमीवर लागू करण्यात आलेले कडक निर्बंध शिथिल करण्यात आले असले तरी अद्याप विवाह सोहळ्यांना परवानगी देण्यात आलेली नाही. मात्र, अशा परिस्थितीत पाथर्डी - गौळाणे रस्त्यालगत असलेल्या एसएसके क्लबमध्ये विवाह सोहळ्याचे आयोजन करण्यात आल्याचा प्रकार समोर आला आहे. याप्रकरणी इंदिरानगर पोलीस ठाणे व महापालिका प्रशासनातर्फे क्लब चालकावर वीस हजार रुपये दंडाची कारवाई करण्यात आली आहे.

नाशिक शहर व जिल्ह्यात कोरोना संसर्ग वाढत असल्याने प्रशासनाने कडक निर्बंध लागू केले होते. तसेच राज्य शासनाने लागू केलेल्या लॉकडाऊनमध्येही विवाह सोहळ्यांवर बंधने घालण्यात आली होती. सध्या शहरातील कडक निर्बंध शिथिल करण्यात आले असले तरी राज्य सरकारचे लॉकडाऊनचे नियम लागू आहेत. त्यामुळे शहर व जिल्ह्यात विवाह सोहळ्यांवरील निर्बंध कायम आहेत. विवाह सोहळ्यांमध्ये शेकडोच्या संख्येने नागरिक हजेरी लावत असून मास्क न वापरणे व सुरक्षित अंतर न ठेवणे यामुळे कोरोना व्हायरसचा संसर्ग वाढत असल्याने त्यामुळे विवाह समारंभाला परवानगी नाकारण्यात आली आहे. अशा परिस्थितीतही शुक्रवारी (दि. ४) रोजी दुपारी दीड वाजता पोलीस नियंत्रण कक्षातून इंदिरानगर पोलीस ठाण्यात गौळाणे रस्त्यालगत एस एस के क्लबमध्ये विवाह समारंभ सुरू आहे, असे सांगण्यात आले. ही माहिती मिळताच वरिष्ठ पोलीस निरीक्षक नीलेश माईनकर यांच्यासह महापालिकेचे अधिकारी व कर्मचारी यांनी तात्काळ घटनास्थळी दाखल होत पाहणी केली. यावेळी क्लबमध्ये विवाह समारंभ होऊन जेवणावळ चालू होती. पोलीस आणि मनपाच्या पथकाला याठिकाणी सुमारे ४५ ते ५० लोक उपस्थित असल्याचे निदर्शनास आले. त्यामुळे संबंधित क्लब चालकाला दंडात्मक कारवाई म्हणून वीस हजार रुपयांचा दंड करण्यात आल्याची माहिती पोलिसांनी दिली आहे.