२५ टॅँकर्स भाड्याने घेण्याचा प्रस्ताव

पाणीटंचाई : प्रभागांमध्ये बसविणार सिंटेक्सच्या टाक्या

नाशिक : शहराला पाणीपुरवठा करणाऱ्या गंगापूर धरणात २८ टक्के पाणीसाठा शिल्लक असून, एप्रिल-मे महिन्यांत ऐन उन्हाळ्यात पाण्याची वाढती मागणी लक्षात घेता महापालिका प्रशासनाने पाणीपुरवठ्यासाठी २५ टॅँकर्स भाड्याने घेण्याचा प्रस्ताव तयार केला आहे. याशिवाय, सिंहस्थ कुंभमेळा पर्वणीकाळासाठी खरेदी केलेल्या सिंटेक्सच्या सुमारे ८०० टाक्या प्रत्येक प्रभागांमध्ये पुरविल्या जाणार आहेत.
महापालिकेने पाणीटंचाईवर मात करण्यासाठी उपाययोजना सुरू केल्या असल्या तरी एकवेळ आणि दर गुरुवारी बंद राहणारा पाणीपुरवठा यामुळे नाशिककरांच्या त्रासात भर पडते आहे. शुक्रवारी सकाळी अनेक भागांत कमी दाबाने व विस्कळीत स्वरूपात पाणीपुरवठा झाल्याच्या तक्रारी महापालिकेकडे आल्या. पाणीपुरवठा वितरण व्यवस्थेबाबत अजूनही प्रशासन चाचपडते आहे. सत्ताधारी मनसेने स्वखर्चाने पाणीपुरवठ्यासाठी टॅँकर्सची व्यवस्था केली असली तरी ती अपुरी ठरत आहे. सद्यस्थितीत महापालिकेकडून सप्ताहातील एक बंद वार वगळता इतर सहा दिवसांत सुमारे ७० दलघफू पाणी गंगापूर धरणातून उचलले जात आहे. गंगापूर धरणात सध्या गंगापूर धरणात १६२४ दलघफू (२८.८४ टक्के), दारणात १७९१ दलघफू (२५ टक्के), कश्यपीमध्ये ५५७ दलघफू (३१ टक्के) याप्रमाणे पाणीसाठा शिल्लक आहे. महापालिकेने गंगापूर धरणातून आतापर्यंत १९८२ दलघफू, तर दारणातून ११३ दलघफू पाण्याची उचल केलेली आहे. गंगापूर धरणातून मनपाला ३१ जुलैअखेर ११३० आरक्षित पाणीसाठा उचलता येणार आहे, तर दारणातून अद्याप १८६ दलघफू पाणीसाठा उचलता येऊ शकेल. महापालिकेला प्रति सप्ताह ७० दलघफू पाण्याची आवश्यकता असल्याने ३१ जुलैपर्यंत ११९० दलघफू पाणी लागणार आहे. सध्या उन्हाची तीव्रता वाढत असल्याने बाष्पीभवनाचे प्रमाण वाढते आहे शिवाय एप्रिल-मे महिन्यांत पाण्याची मागणी वाढणार असल्याने महापालिकेने २५ टॅँकर्स भाड्याने घेण्याचा प्रस्ताव तयार केला आहे. सद्यस्थितीत मनपाकडे स्वत:चे ८ टॅँकर्स आहेत. याशिवाय सिंहस्थात घेण्यात आलेल्या ८०० सिंटेक्सच्या टाक्या प्रभागांमध्ये उपलब्ध करून देण्याचे आदेश स्थायी समिती सभापती सलीम शेख यांनी पाणीपुरवठा विभागाला दिले आहेत. (प्रतिनिधी)