पोलिसांवर राजकीय दबाव खपवून घेणार नाही

नाशिक : शहरात विनापरवानगी मोर्चे काढणे, आंदोलने करणे हे कोणत्याही पातळीवर सहन केले जाणार नाही. कुठल्याही राजकीय व्यक्तीने शहर पाेलीस यंत्रणेवर राजकीय दबाव आणता कामा नये. लोकप्रतिनिधी आणि पोलीस हे दोन्हीही जनसेवक आहे, यामुळे राजकीय व्यक्ती व त्यांचा पदाचा पोलीस नेहमीच आदर करतील. मात्र, त्यांचा दबाव खपवून पोलीस खपवून घेणार नाही, असा स्पष्ट इशारा शहर पोलीस आयुक्त दीपक पाण्डेय यांनी दिला.

नाशिक पोलीस आयुक्तालयात सोमवारी (दि.४) झालेल्या पत्रकार परिषदेदरम्यान, ‘पोलीस विरुद्ध आमदार’ असा वाद उभार राहत असल्याचा प्रश्न पत्रकारांनी विचारला असता, पाण्डेय यांनी स्पष्टवक्ता या आपल्या खास शैलीत उत्तर दिले. ते म्हणाले, पोलीस हे शहरवासीयांच्या सुरक्षिततेसाठी रात्रंदिवस रस्त्यावर आहे. पोलीस हाही माणूस असून, त्याचे मनोधैर्यही तितकेच महत्त्वाचे आहे. यामुळे पोलिसांच्या कारवाईमध्ये विनाकारण हस्तक्षेप करणे, तसेच आपल्या राजकीय पदाचा वापर करत कोणीही राजकीय व्यक्ती जर दबाव निर्माण करत असेल, तर तो कदापी सहन केला जाणार नाही. शहरात ‘अवैध धंदे सुरू आहे...’ असे म्हणणे सोपे आहे. कारण त्यास खूप काही मोठा आधार लागत नाही आणि अवैध धंद्यांना पोलिसांनी परवाने दिलेले नाही, हे लक्षात घ्यावे. यामुळे रोलेट, मटका, जुगार, दारूविक्री याबाबतचे परवाने ज्या महसूल यंत्रणेने दिले आहेत, ते त्यांनी तपासावे, अशी सूचनाही पाण्डेय यांनी यावेळी बोलताना केली.

गुन्हेगाराच्या बचावासाठी महिलांचा कोरोनाच्या काळात थेट पोलीस ठाण्यावर विना परवानगी माेेर्चा आणला, म्हणून आमदार देवयानी फरांदे यांच्यावर कायदेशीर प्रक्रियेप्रमाणे गुन्हा दाखल करण्यात आला आहे, यामध्ये कुठलेही गैर नाही, कायदा हा सर्वांना समान आहे. कारवाई झाल्यानंतर शहरात अवैध धंदे सर्रास सुरू आहे, हे सांगणेही चुकीचे असल्याचे पाण्डेय यावेळी म्हणाले.

--इन्फो--

दबावाखाली नव्हे, तर पोलीस मॅन्युअलप्रमाणे कामकाज

शहर पोलीस आयुक्तालयाचे कामकाज हे कोणत्याही राजकीय दबावाखाली चालत नाही, तर ते पोलीस मॅन्युअलप्रमाणे सुरळीतपणे चालू आहे, यामुळे यापुढे कोणत्याही राजकीय व्यक्तीचा दबाव १३ पोलीस ठाण्यांपैकी कोठेही सहन केला जाणार नाही, असे पाण्डेय यांनी ठणकावून सांगितले. फरांदे यांच्याशी चर्चा करण्यास मी कधीही नकार दिलेला नाही, असेही यावेळी पाण्डेय यांनी बोलताना स्पष्ट केले.

---

दीपक पाण्डेय यांचा सिंगल कॉलम फोटो वापरावा