मालेगावी मोबाइल स्नॅचिंगचे प्रमाण वाढल्याने दहशत

रस्त्यावर चालणाऱ्या व्यक्तीच्या हातातील मोबाइल घेऊन पळणे, दुचाकीस्वारच्या शर्टच्या वरच्या खिशातील मोबाइल लांबवणे, निर्मनुष्य रस्त्यावर एकटे जाणाऱ्या लोकांच्या बाजूने हे चोर स्पोर्ट्स बाईक घेऊन येतात आणि बोलणाऱ्याच्या हातातील मोबाइल अचानकपणे हिसकावून घेत क्षणार्धात रस्त्यावरून पसार होतात. दिवसा किंवा रात्रीच्या वेळी रस्त्यावरून पायी चालताना मोबाइलवर बोलत जात असाल तर सावधान. शहरात अशा पायी चालणाऱ्यांच्या हातातील मोबाइल हिसकावून घेणारी टोळी सक्रिय आहे. अशा प्रकारच्या घटना घडल्याच्या तक्रारी पोलिसांकडे येत आहेत. विशेष म्हणजे हे चोरटे रात्रीचा अंधार आणि रस्त्यावरील शुकशुकाटाचा फायदा घेत चोरीचे कृत्य करीत आहेत. निर्मनुष्य रस्त्यावर एकटे जाणाऱ्या लोकांच्या बाजूने हे चोर स्पोर्ट्स बाईक घेऊन येत, बोलणाऱ्याच्या हातातील मोबाइल अचानकपणे हिसकावून घेत आणि क्षणार्धात रस्त्यावरून पसार होत असत.

स्पोर्ट्स बाईकवरून करतात चोरी, चाळीसगाव फाटा, सोमवार बाजार, चौफुली, सौंदाणे शिवार, मुंबई-आग्रा हायवे, बस स्टॅण्ड परिसर या ठिकाणी जास्त प्रमाणात मोबाइलवर हात मारला जात आहे. या रस्त्यात मोबाइलवर बोलत जात असणाऱ्या एकट्या व्यक्तींना हेरून अचानकपणे त्यांच्या हातातून मोबाइल हिसकावून घेतले जातात, तसेच दुचाकीस्वाराच्या शर्टच्या वरच्या खिशातून मोबाइल हिसकावले जात आहेत.

काल गुरुवारी मालेगाव येथील ‘लोकमत’चे वसीम इकबाल शेख यांचा सौंदाणे शिवारात मुंबई-आग्रा महामार्गावर बाईकवर आलेल्या अज्ञात चोरट्यांनी चौदा हजार रुपये किमतीचा रेडमी नोट नाईन मोबाईल चालू दुचाकीवर वरच्या खिशातून लांबवला. क्षणात झालेल्या चोरीमुळे वसीम काहीही करू शकले नाहीत. चोरटे क्षणात पसार झाले. दुसऱ्या एका घटनेत सोयगाव येथील भूषण अहिरे हे संध्याकाळी पायी फिरत असताना चोरट्यांनी हातातील मोबाइल लांबवला. तसेच सोमवारी शहरात वेगवेगळ्या ठिकाणांहून पाच मोबाइल चोरी जाण्याच्या घटना घडल्या आहेत. जवळपास एक ते दीड लाखाचे मोबाइल आठवडाभरात चोरीस गेले.

चोरी गेलेले मोबाइल हे गुन्हेगारी कृत्यासाठी वापरले जाण्याची दाट शक्यता नाकारता येत नाही. तसेच मालेगावात चोरी मोबाइल विक्रीचे मार्केट जोरात चालू असल्याचे नागरिकांतून चर्चेत आहे. मालेगावी किदवाई रोडवर विक्री होणाऱ्या मोबाइलचे रेकॉर्ड विक्रेत्यांकडे असणे गरजेचे आहे, कारण ते मोबाइल गुन्हेगारी कृत्यात वापरले जाऊ शकतात.

पोलीस प्रशासनाने त्वरित होणाऱ्या मोबाइल चोरीवर आळा बसवावा, अशी नागरिकांची मागणी आहे.