सुरगाणा : घाटमाथ्यावरील बोरगाव-सापुतारा महामार्गावरील ठाणापाडाजवळ शुक्रवारी (दि. २९) दुपारी अडीच वाजेच्या दरम्यान जीप व दुचाकीमध्ये अपघात होऊन एक जण जागीच ठार तर एक जण गंभीर जखमी झाला आहे. याबाबत मिळालेल्या माहितीनुसार, दिंडोरी येथील ३२ वर्षीय विवाहित युवक तुषार सुभाष आंबेकर हे मित्रांसोबत सापुताराकडे जात असताना त्यांची दुचाकी (क्रमांक एम एच १५ जीई ३०८७) व विरुद्ध दिशेने येणाऱ्या जीप (क्रमांक एम एच ४१ सी ४८७७) मध्ये जोरदार धडक झाली. यामुळे तुषार यांना गंभीर मार बसल्याने त्यांचा मृत्यू झाला. तर सोबत असलेला मित्र मनोज यादव रा. दिंडोरी हा गंभीर जखमी झाला आहे. त्याच्यावर जिल्हा रुग्णालयात उपचार सुरू आहेत. तर जीप चालक भीतीने फरार झाला आहे. आंबेकर यांच्या अकाली निधनाने दिंडोरी शहर व परिसरात हळहळ व्यक्त होत आहे. सुरगाणा पोलिसांनी पंचनामा केला असून पुढील तपास करत आहेत. तुषार यांच्या पश्चात आई, पत्नी, मुलगा व मुलगी असा परिवार आहे.