इंदिरानगर : पाथर्डी गावाच्या चौफुलीजवळ दुचाकीला पाथर्डी फाट्याकडून भरधाव आलेल्या दुसऱ्या दुचाकीने जोरदार धडक दिली. या धडकेत दुचाकीस्वार लखन चंपालाल पाटील (वय २८) हा ठार झाला. याप्रकरणी इंदिरानगर पोलीस ठाण्यात गुन्हा दाखल करण्यात आला आहे
पोलिसांनी दिलेल्या माहितीनुसार, बुधवारी (दि. २०) लखन चंपालाल पाटील हा दुचाकी (एमएच १८ बीएस ८५३५) ने आपल्या मित्रांसमवेत हॉटेलमध्ये जेवण करायला गेला होता. जेवण झाल्यानंतर रात्री बारा वाजण्याच्या सुमारास तो घरी परतत असताना पाथर्डी गावाच्या चौफुलीजवळ पाठीमागून भरधाव वेगाने येणाऱ्या दुचाकी (एम एच१५ सीजे ३२१२)च्या चालकाने रस्त्याच्या परिस्थितीकडे दुर्लक्ष करत धडक दिली. यामुळे लखन दुभाजकावर जाऊन आदळला. त्याने डोक्याला हेल्मेट परिधान केलेले नव्हते. यामुळे त्याच्या डोक्याला जबर मार लागून तो रक्ताच्या थारोळ्यात कोसळला. पाठीमागून दुचाकीने येणाऱ्या मित्रांनी तातडीने लखन यास औषध उपचारासाठी खासगी रुग्णालयात दाखल केले; मात्र तेथील डॉक्टरांनी त्यास जिल्हा रुग्णालयात हलविण्याचा सल्ला दिला. गुरुवारी (दि. २१) तीन वाजेच्या सुमारास जिल्हा रुग्णालयात लखनचा मृत्यू झाला.