पदाधिकारी राजीनाम्याच्या तयारीत!

कळवण : मुख्याधिकारी, लेखापाल, अभियंत्याअभावी विकासकामांना ब्रेक

 कळवण : नगरपंचायतीचे कामकाज करताना मोठ्या प्रमाणात अडचणी निर्माण होत असून, निधी उपलब्ध असूनही शासनाने मुख्याधिकारी, लेखापाल व अभियंता यांची नेमणूक केली नसल्याने शासनस्तरावरून निधी खर्च करण्याबाबत मार्गदर्शक सूचना मिळत नसल्याने कामकाज करणे अशक्य झाल्याने तत्काळ मुख्याधिकारी, लेखापाल व अभियंत्यासह महत्त्वाच्या पदावर तत्काळ अधिकारीवर्गाची नियुक्ती करावी अन्यथा शासनाचा निषेध नोंदवत राष्ट्रवादी काँग्रेस आघाडीचे गटनेते कौतिक पगार यांनी सोमवारी पत्रकार परिषदेत घेत शासनाविरोधात असलेली उघड नाराजी बोलून कळवण नगरपंचायतच्या नगराध्यक्ष सुनीता पगार, उपनगराध्यक्ष अनिता महाजन, विषय समिती सभापती जयेश पगार, अतुल पगार, अनिता जैन, रोहिणी महाले यांच्यासह राष्ट्रवादी कॉँग्रेस आघाडीचे १४ नगरसेवक व नगरसेविका राजीनामा देतील, असा इशारा कळवण नगरपंचायतीचे गटनेते कौतिक पगार यांनी यावेळी दिला.ग्रामपंचायतच बरी होती असे कळवणकरांवर म्हणण्याची वेळ आली आहे. नाशिक येथील नगररचना विभागाकडून परवानगी आणण्याची सक्ती नगरपंचायतीमुळे झाली असून, अनेक अडचणींना तोंड देण्याची वेळ आली आहे. मुख्याधिकारी, लेखाधिकारी, अभियंता, आरोग्य विभाग आदि महत्त्वपूर्ण विभागाची यंत्रणा शासनाने तत्काळ नियुक्त करण्याची गरज असताना शासन दुर्लक्ष करीत असल्याचा आरोप उपनगराध्यक्ष अनिता महाजन, विषय समिती सभापती जयेश पगार, अतुल पगार, अनिता जैन व रोहिणी महाले यांनी केला आहे.शासनाने नगरपंचायतीसाठी असलेल्या पदसंख्येला तत्काळ मंजुरी देऊन कायमस्वरूपी यंत्रणेची नियुक्ती करावी, कळवण शहरातील पाणी, रस्ते, वीज, आरोग्य या मूलभूत सुविधांबाबत निर्णय घेण्याचे अधिकार असलेली यंत्रणा कार्यान्वित असली तरी तिची अंमलबजावणी करणारी शासन नियुक्त यंत्रणा कार्यान्वित नसल्याने अडचणी निर्माण होत असल्याचे नगरसेविका रंजना पगार, भाग्यश्री पगार, अनुराधा पगार, रंजना जगताप यांनी सांगितले. नागरिकांना विविध दाखले, गटारींचा प्रश्न, दिवाबत्ती, पाण्याची सोय होत नसल्यामुळे हाल सहन करावे लागत आहेत. शहरातील वीजपुरवठा, पाणीपुरवठा व इतर महत्त्वाची कामे वेळेवर होत नसल्याने नागरिकांमध्ये रोष व्यक्त केला जात असल्याने शासनाने या प्रश्नावर लक्ष घालावे, अशी मागणी शिवसेना शहरप्रमुख नगरसेवक साहेबराव पगार, मयूर बहिरम, बाळासाहेब जाधव, दिलीप मोरे यांनी केली आहे. (वार्ताहर)