कोरोनाबाधितांची संख्या थेट ३५२वर

नाशिक : जिल्ह्यात कोरोनाबाधितांच्या संख्येत आठवडाभरापासून वेगाने वाढ होत असून, रविवारच्या दिवसभरात बाधित संख्या थेट ३५२वर पोहोचली आहे, तर नाशिक मनपा क्षेत्रात एक आणि ग्रामीणला झालेल्या दोन मृत्युमुळे एकूण मृतांची संख्या २०८८ झाली आहे.

नाशिक जिल्ह्यात आतापर्यंत बाधित झालेल्या रुग्णांची संख्या एक लाख १९ हजार ९५८वर पोहोचली असून, त्यातील एक लाख १५ हजार ९२५ रुग्ण पूर्णपणे बरे होऊन घरी परतले आहेत, तर २०८८ रुग्णांवर सध्या उपचार सुरू आहेत. जिल्ह्यात रुग्ण बरे होण्याची सरासरी टक्केवारी ९६.६४ आहे. त्यात नाशिक शहरात ९७.१९, नाशिक ग्रामीण ९६.१४, मालेगाव शहरात ९२.०४, तर जिल्हाबाह्य ९३.५१ असे रुग्ण बरे होण्याचे प्रमाण आहे. जिल्ह्यात आतापर्यंत केलेल्या चाचण्यांची संख्या पाच लाख २८ हजार १४० असून, त्यातील चार लाख सात हजार ७११ रुग्ण निगेटिव्ह, तर एक लाख १९ हजार ९५८ रुग्ण बाधित आढळून आले असून, ४७१ रुग्णांचे अहवाल प्रलंबित आहेत.

इन्फो

चार दिवसात १२३६ बाधित

गत चार दिवसात सातत्याने बाधित संख्या २५०हून अधिक राहिले आहे. रविवारी तर बाधितांच्या संख्येने ३५२पर्यंत मजल मारली. त्यामुळे या चार दिवसात अवघे १,२३६ रुग्ण बाधित आढळून आले आहेत. त्यामुळेच एकूण बाधित संख्येतदेखील मोठी वाढ झाल्याचे दिसून येत आहे.