नाशिक : सलून दुकानात दाढी केल्यानंतर पैसे मागितल्याचा राग आलेल्या चौघा संशयितांनी सलून व्यावसायिकास बेदम मारहाण केल्याची घटना शनिवारी (दि़१०) रात्री नऊ वाजेच्या सुमारास गंगापूर गावात घडली़ अक्षय जाधव, निखिल कटारे, निखिल भगवान जाधव व मन्या (पूृर्ण नाव व पत्ता माहीत नाही) अशी मारहाण करणा-या संशयितांची नावे आहेत़
गंगापूर पोलिसांनी दिलेल्या माहितीनुसार, गंगापूर गावातील राजेश्वर इंगळे यांचे सलूनचे दुकान आहे़ रविवारी रात्री पावणे नऊ वाजेच्या सुमारास संशयित अक्षय जाधव हा आपले तीन मित्र निखिल कटारे, निखिल जाधव व मन्या यांच्यासमवेत दुकानात आला़ याठिकाणी अक्षय याने दाढी केल्यानंतर इंगळे यांनी दाढीचे पैसे मागितले असता अक्षय व त्याच्या मित्रांना राग आला़ त्यांनी सलून व्यावसायिक इंगळे यांना लाथाबुक्क्यांनी जबर मारहाण केली तर यापैकी संशयित मन्या याने हातातील दगड डोके व पाठीवर मारून जबर दुखापत केली़ यानंतर आमच्या विरोधात पोलीस ठाण्यात तक्रार केली तर गंभीर परिणाम भोगावे लागतील, अशी धमकी दिली़
या प्रकरणी इंगळे यांच्या फिर्यादीवरून गंगापूर पोलीस ठाण्यात चौघांच्या विरोधात मारहाणीचा गुन्हा दाखल करण्यात आला आहे.