नांदूरशिंगोटेची शाळा नवीन इमारतीत

नांदूरशिंगोटे : येथील प्राथमिक शाळेचे वर्ग अखेर नव्या इमारतीत भरविण्यास सुरुवात झाली आहे. त्यामुळे टांगणीला लागलेल्या पालकांचा जीव भांड्यात पडला आहे. यापूर्वी शेवटची घटका मोजणाऱ्या व शासनाने निर्लेखित केलेल्या धोकेदायक इमारतीत वर्ग भरविण्यात येत होते. याबाबत ‘लोकमत’ने आवाज उठवल्याने प्रशासनाला जाग आली आणि प्राथमिक शाळा नव्या इमारतीत सुरू झाली.
‘नांदूरशिंगोटे येथील विद्यार्थ्यांचा जीव टांगणीला’ या मथळ्याखाली लोकमतने प्राथमिक शाळेच्या धोकादायक इमारतीचे वृत्त प्रसिद्ध करताच प्रशासनाने विद्यार्थ्यांना नव्या इमारतीत बसविण्याचा निर्णय घेतला. बुधवारी लोकमतचे वृत्त प्रसिद्ध होताच येथील शाळा व्यवस्थापन समितीचे अध्यक्ष सोमनाथ शेळके, उपसरपंच गोपाळ शेळके, मुख्याध्यापक एम.के. सोमवंशी आदिंनी नव्या इमारतीची पाहणी करून त्या वर्गखोल्यांच्या स्वच्छतेच्या सूचना करण्यात आल्या. बुधवारीच सर्व वर्ग स्वच्छ झाल्याने गुरुवारी सकाळपासून नव्या इमारतीचा श्रीगणेशा करण्यात आला. यापूर्वीही गटशिक्षणाधिकारी ए.आर. पाटील यांनीही मुख्याध्यापकांना सूचना केली होती.
गेल्या तीन वर्षांपूर्वी येथे सर्वशिक्षा अभियानांतर्गत लाखो रुपये खर्चून नवी इमारत उभी करण्यात आली होती. मात्र तरीही ती दुर्लक्षित राहिली. जुन्या इमारतीची उभारणी सन १९५९मध्ये करण्यात आली होती. ती जीर्ण होऊन मोडकळीस आल्याने विद्यार्थ्यांच्या जिवाला धोका होता. मात्र असे असतानाही त्याच इमारतीत विद्यार्थी धडे गिरवत होते. याबाबत पालकांनी लक्ष वेधल्यानंतर लोकमतमध्ये वृत्त प्रसिद्ध केल्याने या विषयाला वाचा फोडण्यात आली. त्यामुळे प्रशासन खडबडून जागे झाले व गुरुवारी नव्या इमारतीत विद्यार्थ्यांच्या ज्ञानदानाच्या कार्याला मुहूर्त सापडला. जिल्हा परिषदेकडून या नव्या इमारतीसाठी पहिली ते चौथीच्या विद्यार्थ्यांसाठी बाके मिळाली आहेत. त्यामुळे या विद्यार्थ्यांचा शाळेचा पहिला दिवसाऐवजी तिसरा दिवस खऱ्या अर्थाने फलदायी व आनंदाचा ठरला आहे. (वार्ताहर)