उद्घाटन होऊन मुलतानपुरा रुग्णालय अंधारात!

स्थायी समितीची बैठक सभापती गणेश गिते यांच्या अध्यक्षतेखाली बुधवारी (दि. १८) संपन्न झाली. यावेळी मुलतानपुरा रुग्णालयाचा विषय उपस्थित करण्यात आला. मुलतानपुरा रुग्णालय सुरू करण्यासाठी आपण पाठपुरावा केला, असे राष्ट्रवादीच्या समिना मेमन यांचा दावा असून, स्वातंत्र्य दिनाचे मुहूर्त साधून त्यांच्याच पक्षाचे सुफी जीन यांनी पालकमंत्री छगन भुजबळ यांच्या हस्ते उद्घाटन करून घेतले. त्यामुळे मेमन नाराज आहेत. या कामाचे श्रेय कोणीही घ्या, मात्र रुग्णालय सुरू तर व्हायला हवे ना, असे सांगून त्यांनी रुग्णालयात गेल्या दोन वर्षांपासून वीजपुरवठा खंडित आहे. तसेच एक्स-रे मशीनदेखील सुरू झालेले नाही, मग असे असताना उद्घाटनाची घाई कशासाठी केली, असा प्रश्न त्यांनी केला. तर रुग्णालयाचे वीजपुरवठ्याचे थकीत बिल भरण्यासाठी एक लाख १९ हजार रुपयांचा धनादेश तयार आहे. मात्र, महावितरणने पेनॉल्टी लावली आहे, तीही भरायची आहे, असे वैद्यकीय अधीक्षक डॉ. बापुसाहेब नागरगोजे यांनी सांगितले. तर प्रशासन कोणाच्या तरी दबावाखाली उद्घाटन आणि अन्य कामे करीत असल्याचा आराेप समिना मेमन यांनी केला.

रुग्णालय सुरू होत नसल्याने मनसेचे सलीम शेख यांनीही नाराजी व्यक्त केली.

दरम्यान, शहरातील जंतुनाशक फवारणीबाबतदेखील कर्मचाऱ्यांकडून दुरुत्तरे केल्याचा आरोप योगेश हिरे यांनी केला. सलीम शेख यांनी सुट्टीच्या दिवशी कामावर येणाऱ्या कामगारांना नियमानुसार त्या दिवसाचे दुप्पट वेतन दिले जात नसल्याचा प्रश्न उपस्थित केला.

इन्फो..

मीटर नाही म्हणून वीजपुरवठा नाही...

नाशिक महापालिकेतर्फे मुलतानपुरा रुग्णालय पाडून नव्याने बांधण्यात आले आहे. कोराेनाकाळात नवीन रुग्णालय सुरू होऊ शकले नाही. कारण वीजबिल थकल्याने महावितरणने रुग्णालयाचा पुरवठा खंडित केला होता. आता महापालिका थकीत रक्कम भरण्यास तयार आहे, मात्र मीटरच शिल्लक नाही, असा प्रकार वैद्यकीय अधीक्षक डॉ. नागरगोजे यांनी उघड केला.