गोल्फ क्लब मैदानावर आज महाआरोग्य शिबिर

तयारी पूर्ण : पालकमंत्र्यांचे शिबिर यशस्वी करण्याचे आवाहन

नाशिक : जिल्ह्यातील गरीब आणि गरजू रुग्णांना तज्ज्ञ डॉक्टरांपर्यंत पोहोचण्याच्या उद्देशाने गोल्फ क्लब मैदानावर आयोजित महाआरोग्य शिबिराची तयारी पूर्ण झाली असून, पालकमंत्री गिरीश महाजन यांनी तयारीची शिबिराच्या पूर्वसंध्येला पाहणी केली. पालकमंत्र्यांनी स्वयंसेवकांना तसेच कृती समित्यांच्या प्रमुखांसह कार्यकर्ते तथा पदाधिकाऱ्यांना नियोजनानुसार जबाबदारी पार पाडीत शिबिर यशस्वी करण्याचे आवाहन केले. तसेच शिबिरासाठी उपस्थित डॉक्टरांशीही विचारविनिमय केला. पालकमंत्री गिरीश महाजन यांनी तयारीची पाहणी करताना उपस्थित स्वयंसेवक तथा कृती समिती प्रमुखांशी संवाद साधला. शिबिरासंदर्भात असलेल्या अडचणी व समस्या जाणून घेत कार्यकर्त्यांच्या शंकांचे निरसन केले. नाशिक शहराने ज्याप्रमाणे कुंभमेळा यशस्वी करून दाखवला त्याचप्रमाणे हा आरोग्याचा महाकुंभही यशस्वी होईल, असा विश्वास व्यक्त करताना आरोग्य शिबिराच्या माध्यमातून लाखो रुग्णांच्या आजारांचे निदान व त्यांच्यावर उपचार आणि शस्त्रक्रिया करण्यात येणार असल्याने हा कीर्तिमान ठरणार असल्याचे सांगितले. सर्वसामान्य नागरिकांना आरोग्य सेवा देऊन त्यांच्या आजारांचे निदान व उपचार करण्यासाठी महाआरोग्य शिबिर असल्याचे त्यांनी स्पष्ट केले. शिबिरात सहभागी स्वयंसेवक व डॉक्टरांना सर्व सुविधा तसेच जेवण व पाणी जागेवर मिळणार असून, शिबिराच्या वेळेत कोणीही आपले स्थान सोडून रुग्णांची गैरसोय होऊ देऊ नये, अशा सूचनाही पालकमंत्र्यांनी यावेळी दिल्या. यावेळी आमदार देवयानी फरांदे, बाळासाहेब सानप, सीमा हिरे, रवींद्र सिंघल, जिल्हाधिकारी बी राधाकृष्णन, शिबिराचे मुख्य समन्वयक रामेश्वर नाईक, प्रदेश सरचिटणीस लक्ष्मण सावजी, सुहास फरांदे, वसंत गिते, सुनील बागुल, डॉ. प्रशांत पाटील, गोपाळ पाटील, मिलिंद शंभरकर, विभागीय आयुक्त एकनाथ डवले, सुशील वाकचौरे आदि उपस्थित होते. दरम्यान, आतापर्यंत ५० हजारहून अधिक रुग्णांची प्राथमिक तपासणी झाली असून, अनेकांची प्राथमिक नोंदणीही करण्यात आली आहे. या सर्वांना नोंदणी केंद्रावर नोंद करून शिबिरात उपचार घेता येणार असून, शिबिरात हृदयरोग, किडनीचे आजार, मेंदू विकार, कॅन्सर, गर्भाशय, बालरोग आदि आजारांवर उपचार करण्यात येणार आहे. (प्रतिनिधी)