जिल्हा बॅँकेनंतर बाजार समित्यांमध्ये ‘द्वंद’

नाशिक, पिंपळगाव, कळवणसाठी स्पर्धा

  नाशिक : नुकत्याच आटोपलेल्या जिल्हा मध्यवर्ती सहकारी बॅँकेच्या निवडणुकीनंतर आता शेतकरी आणि सहकाराशी निगडित असलेल्या आणखी एका क्षेत्रात कट्टर प्रतिस्पर्धी एकमेकांसमोर उभे ठाकणार आहेत. जुलैमध्ये मतदान होणाऱ्या या कृषी उत्पन्न बाजार समित्यांच्या आडून सरळसरळ राजकारणातील उट्टे आणि विजय-पराभवाची परतफेड करण्याचे काम होईल, असे दिसते. जिल्हा बॅँकेसाठी नाशिक तालुका गटातून ऐनवेळी उमेदवारी करून महापालिका स्थायी समिती सभापतिपदापाठोपाठ शिवाजी चुंभळे यांनी जिल्हा बॅँकेचे संचालक पदही नाट्यमयरीत्या मिळविले. अर्थात जिल्हा बॅँकेवरील दीड दशकाची सत्ता भोगलेले माजी खासदार देवीदास पिंगळे जरा आत्मविश्वासातच असल्याने त्यांना फटका बसला. आता नाशिक कृषी उत्पन्न बाजार समितीच्या निवडणुकीच्या रिंगणात पुन्हा एकदा पिंगळे विरुद्ध चुंभळे अशीच लढत होण्याची चिन्हे आहेत. देवीदास पिंगळेंचे गेल्या दोन दशकापेक्षा जास्त काळ बाजार समितीवर वर्चस्व असून, नाशिकला त्र्यंबकेश्वर व पेठ हे तालुकेही जोडलेले असल्याने निवडणूक चुरशीची होण्याची शक्यता आहे. शिवाजी चुंभळे यांना माजी जिल्हा परिषद उपाध्यक्ष संपतराव सकाळे, मुरलीधर पाटील यांची साथ मिळण्याची शक्यता आहे. तर पिंगळे यांना त्यांच्याच जुन्या सहकाऱ्यांवर मदार ठेवावी लागणार आहे. अर्थात माजी खासदार स्व. उत्तमराव ढिकले यांना मानणारा बाजार समितीतील एक वर्ग डॉ. सुनील ढिकले यांनाही पॅनलनिर्मितीसाठी गळ घालू शकतो. तसेही डॉ. सुनील ढिकले यांना नाशिक साखर कारखान्याच्या संचालकपदाचा अनुभव येथे कामी येईल. अर्थात ढिकले आणि चुंभळे एकत्र येतात, की पिंगळे ढिकलेंना जोडीला घेतात, यावरही गणिते अवलंबून आहेत. तिकडे पिंपळगाव बाजार समितीच्या माध्यमातून पुन्हा एकदा आजी-माजी आमदार अनिल कदम व दिलीप बनकर समोरासमोर उभे ठाकतील. निफाड साखर कारखान्यात स्व.डॉ. वसंत पवार यांच्या सोबतीने अनिल कदम यांनी सत्ता मिळवली होती. आताही जिल्हा बॅँकेच्या संचालकपदाचा कदम-बनकर कसा वापर करतात, हेही बाजार समितीच्या निवडणुकीत दिसून येईल. तिकडे कळवण कृषी उत्पन्न बाजार समितीत सत्ता राखण्यासाठी मविप्र संचालक व जिल्हा परिषद सदस्य रवींद्र देवरे व जिल्हा बॅँक संचालक धनंजय पवार पुन्हा एकदा प्रयत्न करीत आहेत. समोरून जे. डी. पवार, उद्धव अहेर, कौतिक पगार एकत्र येऊन पॅनल स्थापणार असल्याची चर्चा आहे. त्यामुळे कळवणमध्येही बाजार समिती निवडणुकीत नाशिक, पिंपळगाव प्रमाणेच राजकीय द्वंद पाहावयास मिळू शकते.(प्रतिनिधी)