अध्यक्षपदासाठी लॉबिंग सुरू

इच्छुकांकडून सदस्यांची विनवणी सुरू

  नाशिक : जिल्हा परिषद अध्यक्ष व उपाध्यक्षपद निवडणुकीचे पडघम वाजण्यास सुरुवात झाली असून, येत्या २१ सप्टेंबर रोजी होणाऱ्या या निवडणुकीसाठी राष्ट्रवादीतील प्रबळ दावेदारांनी राष्ट्रवादीसह सहयोगी अपक्ष सदस्यांना अध्यक्षपदासाठी मदत करण्याची विनवणी सुरू केली आहे. काही अपक्ष सदस्यांना व राष्ट्रवादीच्या आक्रमक सदस्यांना एका इच्छुकाच्या पतीराजाने सकाळपासूनच दूरध्वनी करून काय करायचे, मदत करणार काय, अध्यक्षपद मिळाल्यास त्याचा फायदा आगामी विधानसभा निवडणुकीत कसा होईल हे पटवून देण्याबाबतही चर्चा केल्याचे कळते. अध्यक्षपदावर दावा सांगणाऱ्यांची संख्या राष्ट्रवादीत दिवसागणिक वाढतच असून, अध्यक्ष व उपाध्यक्षपदाच्या निवडीनंतर होणाऱ्या विषय समिती सभापतिपदाच्या निवडणुकीवर डोळा ठेवूनच अध्यक्षपदाच्या निवडणुकीकडे सदस्य पाहत असल्याची चर्चा जिल्हा परिषदेच्या वर्तुळात आहे.