अखेरचे तीन तास... नाशिककरांनो मतदानासाठी बाहेर पडा !

व्हॉटस अ‍ॅपवर भावनिक साद : पहिल्या सहा तासांत केवळ ३० टक्के मतदान

अझहर शेख : नाशिक
‘नाशिककर पहिल्या सहा तासांत फक्त ३० टक्के मतदान झालयं? हा आकडा नाशिककरांच्या उत्साहाला शोभणारा नाही. यावेळी सर्वाधिक मतदान आपल्या नाशिकमधून करायचयं ना? परंतु ठाणे, पुणे, अकोलासुद्धा आपल्या पुढे...तुम्हाला वाटत नाही का, आपल्या नाशिकसाठी चांगले लोकप्रतिनिधी निवडून द्यावे? नाशिककरांनो बाहेर पडा, मतदान करा, पुढील पाच वर्षे संधी नाही...आपल्या नाशिकच्या प्रगतीसाठी आपण एवढे तर कराल ना..? लोकशाही सणाचा आनंद लुटा, हा संदेश पुढेही पाठवा.’ अशी भावनिक साद नाशिककरांनी व्हॉट््स अ‍ॅपवरून घातली. बहुसदस्सीय पद्धतीने राबविली जाणारी मतदानप्रक्रिया, नवीन प्रभाग रचना, मतदार याद्यांचा झालेला घोळ, उन्हाची तीव्रता, नावांची शोधाशोध, राहत्या परिसरापासून दूर अंतरावर असलेल्या मतदान केंद्रावर आलेले क्रमांक अशा एक ना अनेक कारणांमुळे नाशिककरांना मतदानाचा हक्क बजावताना अडथळ्यांची शर्यत पार करावी लागत होती. याचा थेट परिणाम झाला तो मतदानाच्या टक्केवारीवर.  पहिले सहा तास उलटूनदेखील केवळ तीस टक्के मतदान महापालिकेच्या निवडणुकीचे झाल्याने सर्वच जागरूक नेटिझन्सला धडकी भरली. त्यांनी तत्काळ व्हॉट््स अ‍ॅपवरून वरील मजकुराची पोस्ट तयार करून ती विविध ग्रुपमध्ये व्हायरल केली. या पोस्टचा सकारात्मक प्रभाव मतदारांवर पडला. बहुतांश लोकांनी मरगळ झटकून कंटाळा न करता थोडाफार मनस्ताप सहन करण्याची मनाची तयारी करून घराचा उंबरा ओलांडला. ज्या केंद्रांवर दुपारी दोन वाजेपर्यंत तुरळक गर्दी दिसून येत होती त्याच केंद्रांवर चार वाजेनंतर मतदारांनी लोकशाहीचा अधिकार आणि राष्ट्रीय कर्तव्य बजावण्यासाठी गर्दी केल्याने लांबलचक रांगा परिसरात दिसून येत होत्या. नाशिकच्या मतदानाचा टक्का वाढण्यास मदत झाली. जे मतदार साडेपाच वाजेपर्यंत मतदान केंद्रावर पोहचले त्यांना पोलिसांनी सहकार्य करत केंद्राच्या आतमध्ये रांग करा सांगत प्रवेशद्वार बंद केले.