येवला येथे ज्यु. अमिताभ बच्चन यांच्या कार्यक्रमास उत्स्फूर्त प्रतिसाद

येवला येथे ज्यु. अमिताभ बच्चन यांच्या कार्यक्रमास उत्स्फूर्त प्रतिसाद

येवला : ‘लोकमत सखी मंच’ व बालविकास मंचच्या सभासदांसाठी ज्युनिअर अमिताभ बच्चन अर्थात शशिकांत पेडवाल यांनी येवला शहरातील विविध विद्यालयांमध्ये ‘संस्कारांचे मोती’ उपक्रमाचे महत्त्व सांगत कार्यक्रम सादर केला.
प्रारंभी त्यांनी विद्या इंटरनॅशनल धानोरे येथील विद्यालयात केबीसीमधील कार्यक्रमाचे प्रत्यक्ष रूप आपल्या डायलॉगमधून दाखविण्याचा प्रयत्न केला. मुख्याध्यापक महेश अय्यर यांनी पेडवाल यांचे स्वागत केले. येथील डी. पॉल विद्यालयात टाळ्यांचा कडकडाट व विविध उदाहरणांसह संस्कारक्षम जीवन जगण्यासाठी संस्कारांचे मोती कार्यक्रमाचा सहभाग याबाबतचे महत्त्व ज्युनिअर अमिताभ यांनी पटवून दिले. मुख्याध्यापक फादर जोसेफ, वंदना शिंपी यांनी विशेष सहकार्य केले. येथील जनता विद्यालयात मुख्याध्यापक एल. एम. म्हसदे व नानासाहेब पटाईत यांनी संस्कारांचे मोती कार्यक्रमासाठी विशेष सहकार्य केले. येथे ज्युनिअर अमिताभ यांनी ‘कौन बनेगा करोडपती’ या कार्यक्रमाची झलक दाखविली. आईवडिलांना कधीही विसरायचे नाही तसेच संस्कार मोतीतून जीवनात मिळणारे ज्ञान महत्त्वपूर्ण आहे, असे सांगत या उपक्रमात सहभागी होण्याचे आवाहन केले.
स्वामी मुक्तानंद विद्यालयात, संस्कारांचे मोती उपक्रमास उत्स्फूर्त प्रतिसाद मिळाला. कौन बनेगा करोडपती व अमिताभच्या डायलॉगला विद्यार्थ्यांनी विशेष दाद दिली. मुख्याध्यापक भड यांनीही ‘लोकमत’च्या उपक्रमाचे कौतुक करून उपस्थितांचे सत्कार केले.
येथील राधाकृष्ण लॉन्सवर प्रेक्षकांच्या उपस्थितीत लाजवाब कार्यक्रम झाला. प्रारंभी स्व. जवाहरलालजी दर्डा यांच्या प्रतिमेचे पूजन करण्यात आले व पुष्पहार अर्पण करण्यात आला.
यावेळी श्री गुरुदेव दत्त नागरी पतसंस्थेचे संस्थापक भरत धुमाळ, येवला शहर पोलीस निरीक्षक रणजित डेरे, अभियंता सौरभिनी कांगणे, पुष्पम ज्वेलर्सच्या संचालक मीनल वर्मा, जनकल्याण सेवा समितीचे संस्थापक नारायणमामा शिंदे, उद्योगपती भारत वर्मा आदि या कार्यक्रमास उपस्थित होते.
उद्योगपती भारत वर्मा, पोलीस निरीक्षक रणजित डेरे, सौरभिनी कांगणे यांनी मनोगत व्यक्त केले. ‘लोकमत’ने राबविलेला हा उपक्रम खऱ्या अर्थाने लोकोपयोगी आहे. संस्कारक्षम मने घडविण्याचे काम या उपक्रमातून होत असल्याबद्दल आनंद व्यक्त केला.
दीपक कडलग यांनी येवल्यातील चारही कार्यक्रमांत भन्नाट मिमिक्री करून उपस्थितांना खिळवून ठेवले. उपस्थितांचे स्वागत व सत्कार ‘लोकमत’चे येवला प्रतिनिधी दत्ता महाले व वितरण प्रतिनिधी संदीप पाबळे यांनी केले. याशिवाय सखी मंच व बालविकास मंचच्या अनेक सदस्यांनी या कार्यक्रमादरम्यान आपल्या प्रतिक्रिया नोंदविल्या. कार्यक्रमास सुमारे ३०० ते ४०० सखी मंच सभासद व मोठ्या संख्येने विद्यार्थी व पुरुष मंडळीदेखील उपस्थित होते