संमेलनाची जागा कमी पडण्याची आयोजकांना उपरती !

नाशिक : नाशिकच्या साहित्य संमेलनास केवळ ४-५ हजारांची उपस्थिती असेल, अशा भ्रमात राहून नियोजन करणाऱ्या आयोजकांना संमेलन दीड महिन्यांवर आल्यानंतर यापूर्वी निर्धारित केलेली गोएसोच्या इंजिनिअरिंग कॉलेजनजीकची जागा अपुरी पडणार असल्याची उपरती झाली. त्यामुळे अखेर गोएसो कॅम्पसमधील जिमखान्यानजीकच्या सर्वात मोठ्या क्रिकेट मैदानावरच संमेलनाच्या उद्घाटनाचा मुख्य सोहळा रंगणार आहे.

नाशिकच्या साहित्य संमेलनासाठी स्थळ पाहणीकरिता साहित्य महामंडळाची स्थळदर्शन समिती जेव्हा नाशिकला आली होती, त्यावेळी प्रारंभी त्यांना प्रस्तावित इंजिनिअरिंग कॉलेजची जागा आणि आसपासचा परिसर दाखवण्यात आला. त्यांनी फारसा विचार न करता या स्थळाला मंजुरीदेखील दिली. मात्र, अनेक संमेलनांना गेलेल्या मान्यवरांनी नाशिकमधील गोएसोच्या इंजिनिअरिंग कॉलेजसमोरील मैदान कमी पडणार असल्याचे संमेलनाच्या स्थळ निश्चितीपासून आयोजकांना सांगितले होते. मात्र, संमेलन पदरात पडल्याच्या आनंदातच मश्गूल असलेल्या पदाधिकाऱ्यांनी त्या सूचनांकडे दुर्लक्ष केले होते. तसेच स्थळ निश्चितीपूर्वीच गोएसो कॅम्पसमधील क्रिकेट मैदान संमेलनासाठी दिले जाणार नसल्याचे डॉ. मो.स. गोसावी तसेच शैलेश गोसावी यांनी स्पष्ट केले होते. त्यामुळे पुन्हा त्याबाबत विचारणा करण्याचीही आयोजकांना धास्ती वाटत होती. मात्र, जागेबाबतच्या चर्चेची कुणकुण स्वागताध्यक्ष छगन भुजबळ यांच्या कानापर्यंत पोहोचल्यावर त्यांनी जागा अपुरी पडल्यास नाचक्की होणार असल्याने तत्काळ गोएसोच्या पदाधिकाऱ्यांशी संवाद साधण्यास लोकहितवादी संस्थेच्या पदाधिकाऱ्यांना सांगितले. त्या मैदानावर मार्च महिन्याच्या मध्यापर्यंत पूर्वनियोजित क्रिकेट सामने असल्याने उर्वरित आठवडाभराच्या कालावधीत स्टेजसह अन्य सुविधा कशा उभारायच्या हा देखील पेच होता. परंतु, संमेलनस्थळ अपुरे पडल्यास सारेच नियोजन फसणार असल्याचे लक्षात आणून दिल्यानंतर डॉ. गोसावी सरांनी मार्चच्या मध्यानंतर मैदान वापरास परवानगी दिल्याचे समजते. मात्र, मैदानाची किमान नासधूस होईल, याबाबत दक्षता घेण्याची सूचना देखील देण्यात आली.

इन्फो---

पार्किंगसाठीही अतिरिक्त जागांसाठी प्रयास

गोएसो कॅम्पसमधील मुख्य क्रिकेट मैदानात सर्वाधिक गर्दीचा उद्घाटन सोहळा क्रिकेट मैदानावर होण्याचे निश्चित झाल्याने गर्दी आणि त्याचबरोबर वाहनांची संख्यादेखील हजारो राहण्याची शक्यता आहे. त्यामुळे संमेलनासाठी येणाऱ्या हजारो रसिकांच्या पार्किंगसाठी गोएसो कॅम्पसबाहेरील मोकळ्या जागा, पटांगणे, ओपन प्लॉट शोधण्यासदेखील प्राधान्य देण्याचे निर्देश देण्यात आले आहेत.

लोगो

शुक्रवारी मुख्य अंकात प्रसिद्ध झालेला संमेलनाचा लोगोच वापरावा.