मानूरच्या कोविड सेंटरमध्ये अपुरे मनुष्यबळ

कळवण शहर व तालुक्यात कोरोनाबाधितांची संख्या दिवसेंदिवस वाढत असून अभोणा व मानूर येथे कोविड सेंटर कार्यरत करत तेथे रुग्णांवर उपचार केले जात आहे. मात्र याठिकाणी बेडची संख्या कमी पडत असल्याची वस्तुस्थिती आहे. मानूर येथील आदिवासी मुलींच्या वसतिगृहात डेडिकेटेड कोविड हेल्थ सेंटर सुरु करण्याचे नियोजन करण्यात आले. सध्या तेथे ३२ ऑक्सिजन बेड असून उपजिल्हा रुग्णालयातील डॉ. प्रल्हाद चव्हाण यांच्यासह चौघे वैद्यकीय अधिकारी तात्पुरत्या स्वरूपात काम बघत आहेत. मात्र आवश्यक असलेले कायमस्वरूपी मनुष्यबळ उपलब्ध करण्यासाठी तालुका नोडल अधिकारी असलेले उपजिल्हा रुग्णालयाचे वैद्यकीय अधीक्षक यांचा शासनस्तरावरील यंत्रणेकडे पाठपुरावा कमी पडत असल्याचे चित्र आहे. फेब्रुवारी, मार्च महिन्यापासून कळवण तालुक्यात कोरोनाबाधितांची संख्या दिवसागणिक वाढत असल्यामुळे डेडिकेटेड कोविड हेल्थ सेंटरमध्ये उपचार घेणाऱ्या रुग्णांची संख्या देखील वाढली आहे. त्यामुळे तेथे आवश्यक असलेले मनुष्यबळ कमी पडू लागले आहे.

तालुका नोडल अधिकाऱ्यांनी वाढणाऱ्या कोरोनाबाधित रुग्ण संख्येवरून डीसीएचसी सेंटरसाठी जिल्हा शल्य चिकित्सक यांच्याकडे आवश्यक मनुष्यबळ,साहित्य, वाहन व्यवस्थेची तातडीने मागणी करुन व्यवस्थापन नियोजन करणे गरजेचे आणि आवश्यक होते. मात्र त्याकडे दुर्लक्ष करण्यात आले. आता रुग्ण संख्या वाढल्यानंतर एप्रिल महिन्यात वरिष्ठ यंत्रणेकडे पत्रव्यवहार करण्याची धावाधाव होत आहे. याठिकाणी ऑक्सिजन सिलेंडरचे रोज पुनर्भरण करावे लागते त्यामुळे तेथे वाहन व्यवस्थेची गरज असून भीषक, वैद्यकीय अधिकारी, अधिपरिचारिका, प्रयोगशाळा वैज्ञानिक अधिकारी,औषध निर्माण अधिकारी, ई. सी. जी तंत्रज्ञ, क्ष किरण वैज्ञानिक अधिकारी, डाटा एन्ट्री ऑपरेटर, हॉस्पिटल मॅनेजर, कक्ष सेवक, सफाईगार, सुरक्षारक्षक आदी मनुष्यबळाची गरज निर्माण झाली आहे.

इन्फो

रुग्णसंख्या वाढीनंतर धावाधाव

वैद्यकीय मनुष्यबळ यंत्रणा अपूर्ण पडत असल्याची ओरड एकीकडे लोकप्रतिनिधी करीत आहेत तर दुसरीकडे शासकीय यंत्रणेचा पाठपुरावा कमी पडत असल्याची ओरड वरिष्ठ यंत्रणा करीत असल्यामुळे बाधित रुग्णाच्या जीवाशी आरोग्य यंत्रणा खेळ खेळत असल्याचा आरोप होत आहे. कोविड सेंटरमध्ये मनुष्यबळाचे योग्य प्रकारचे नियोजन करणे आवश्यक आहे. परंतु रुग्णसंख्या वाढल्यानंतर आता पळापळ सुरू झाली आहे.