सदनिकांमध्ये वाढतोय सर्पांचा संचार

सावधान ! : सर्प निघण्याच्या वाढल्या घटना

नाशिक : मागील आठवड्यात सिडकोतील एका महिलेचा सर्पदंशाचे मृत्यू झाल्याची दुर्दैवी घटना घडली.याचदरम्यान हॉटेल जत्रा मार्गावर एका घरामधील बाथरूमध्ये सर्प आढळून आला होता. घरात आणि घराच्या परिसरात सर्प आढळण्याचे प्रकार अलीकडे वाढीस लागल्याचे या घटनांवरून दिसून येते. या संदर्भातील माहिती जाणून घेतली असता गेल्या काही दिवसांपासून घरामध्ये सर्प आढळत असल्याचे प्रकार समोर आले आहेत. सर्वसामान्यांना सर्पाविषयीची जुजबी माहिती असते. शिवाय सर्प आढळून आल्यानंतर सर्वांचीच घाबरगुंडी उडते. यापेक्षाही गंभीर बाब म्हणजे आता सर्प नागरिकांच्या घरात आणि न्हाणीघरात आढळून येत आहेत. अगदी बैठे घर ते इमारतीमधील तिसऱ्या मजल्यापर्यंत सर्प आढळत असल्यानी चिंतेची बाब निर्माण झाली आहे. मुले खेळत असलेली उद्यानांमध्येही कित्येकदा सर्प आढळून येतो. परंतु नागरिकांना ठोस उपाययोजनेसाठीची कोणतीच व्यवस्था नाही. केवळ संपर्कातील सर्पमित्रांशिवााय त्यांच्याकडे पर्यायच उरत नाही. पालिका यावर काय करणार हा खरा प्रश्न आहे.