आडगावला कौलारू घरे पेटली : आग आटोक्यात

मते गल्लीतील दगडोबा मंदीराजवळ असलेल्या कौलारू घरांच्या चाळीला आज दुपारी साडेबारा वाजेच्या सुमारास अचानकपणे आग लागली.

नाशिक : येथील आडगावमध्ये असलेल्या मते गल्लीतील दगडोबा मंदीराजवळ असलेल्या कौलारू घरांच्या चाळीला आज दुपारी साडेबारा वाजेच्या सुमारास अचानकपणे आग लागली. या वाड्यात  सर्व रहिवासी सुरक्षित असल्याची माहिती अग्निशामक दलाने दिली आहे. घटनेची माहिती मिळताच अग्निशामक विभागीय कार्यालय, कोणार्क नगर येथील पंचवटी विभागीय अग्निशामक केंद्राचा बंब प्रथम रवाना झाला. अवघ्या पाच मिनिटांत बंब घटनास्थळी पोहचल्याने आग विझविण्याच्या कार्याला जलद सुरूवात झाली. त्यानंतर शिंगाडा तलाव मुख्यालयाचा एक बंब व पंचवटी उपकेंद्रावरील दोन बंब असे एकूण चार बंब घटनास्थळी पोहचले आहे. वाऱ्याचा वेग अधिक असल्यामुळे आणि वाडा कौलारू असल्याने आगीने रौद्रावतार धारण केला होता.

आग विझविण्याचे कार्य जलदगतीने सुरू असून आग आटोक्यात आल्याची माहिती सुत्रांनी दिली आहे. मुख्यालयातील लिडिंग फायरमन इकबाल शेख, शिवाजी फुगट, इस्हाक शेख, दिनेश लासूरे, जयंत्र सांत्रस, सुनील घुगे, उमेश झिटे, विजू गायकवाड, संजय गाडेकर, संतोष मेंद्रे आदि जवान आग विझविण्याचे कार्य करत आहेत. आग आटोक्यात आली आहे. चार बंब घटनास्थळी पोहचले असून महाजन यांच्या घरात प्रथमत: गॅस सिलिंडरचा स्फोट होऊन आग लागल्याची परिसरात चर्चा आहे. एकमेकांना आठ ते दहा घरे लागून असून सर्व घरे जुन्या पध्दतीची कौलारू असल्यामुळे तत्काळ आगीने भीषण रूप धारण केले.