‘हेड लाइट इज आॅलवेज आॅन’

दुचाकीचा दिवा दिवसा सुरू असल्याचे दिसल्यास अनावधानाने चालकाला विसर पडल्याचा सर्व सामान्यांचा समज असतो.

 नाशिक : दुचाकीचा दिवा दिवसा सुरू असल्याचे दिसल्यास अनावधानाने चालकाला विसर पडल्याचा सर्व सामान्यांचा समज असतो. त्यामुळे सर्वसामान्यांकडून अशा वाहनचालकांना हाताचा इशारा करून दिवा सुरू असल्याचे लक्षात आणून देण्याचा प्रयत्न आजपर्यंत होत आला आहे; मात्र आता भरदिवसा दुचाकींचे दिवे लागलेले असल्यास नागरिकांनी आश्चर्य वाटू देऊ नये, कारण चालकाच्या हातात दिवा बंद करणे राहिलेले नाही.
सर्वोच्च न्यायालयाच्या निर्णयानंतर ‘बीएस-४’ इंजिनच्या नवीन दुचाकी बाजारात आल्या असून, गुढीपाडव्यापासून या दुचाकींची विक्रीदेखील सुरू झाली आहे. या नवीन दुचाकींचे वैशिष्ट म्हणजे मुख्य दिवा (हेड लाइट) स्वयंचलित आहे. त्यामुळे भरदिवसाही दिवे सुरू असलेल्या दुचाकी रस्त्यांवर धावताना दिसून येत आहेत. हळूहळू अशा दुचाकींची संख्या रस्त्यावर वाढणार असून, दिवसाही दुचाकींचे दिवे चालूच राहणार आहे. कारण रस्ता सुरक्षेसाठी सरकारच्या वाहतूक मंत्रालयाने दुचाकी उत्पादकांसोबत सल्लामसलत करून रस्ते अपघात टाळण्यासाठी दुचाकींचे इंजिन सुरू होताच मुख्य दिवा प्रज्वलित होणार आहे.