वर्षभरात साडेतीन कोटींचा गुटखा जप्त

महाराष्ट्र शासनाने प्रतिबंधित केलेला गुटखा, पानमसाला वा तत्सम अन्नपदार्थ चोरीछुप्या मार्गाने राज्यात अवैधरीत्या आणून व्यवसाय करीत असल्याचे निदर्शनास आले आहे. अन्न व औषध प्रशासन विभागाने वेळोवेळी अशा अपप्रवृत्तीच्या व्यक्तीविरुद्ध कठोर कारवाई करून या व्यावसायिकांची दुकाने, टपऱ्या सीलबंद केल्या आहेत, तर काहींचा अन्न परवाना रद्द केला आहे. अन्न व औषध प्रशासन कार्यालयाने मागील वर्षभरात विविध ५३ ठिकाणी छापे टाकून सुमारे ३ कोटी ६७ लाख ६ हजार ८३७ रुपये किमतीचा प्रतिबंधित अन्नपदार्थ सील केला आहे. त्यापैकी ४४ ठिकाणे सीलबंद करण्यात आली, तसेच प्रतिबंधित अन्नपदार्थ वाहतूक करणारी ९ वाहने जप्त करण्यात आली आहेत. अन्न व्यावसायिकांनी कायद्यातील तरतुदींचे पालन करून व्यवसाय करावा, जनतेच्या आरोग्याशी खेळ खपवून घेतला जाणार नाही, असा इशाराही सहआयुक्त चंद्रशेखर साळुंखे यांनी दिला आहे.