दीड दिवसाच्या गणरायाला निरोप

‘गणपती बाप्पा मोरया, पुढल्या वर्षी लवकर या’ असा जयघोष करत दीड दिवसाच्या गणरायाला शुक्रवारी दुपारी विधिवतपणे निरोप देण्यात आला. शुक्रवारी दुपारी दीड दिवसाच्या गणरायाचे गोदावरी नदीपात्रात विसर्जन करण्यात आले.

पंचवटी: ‘गणपती बाप्पा मोरया, पुढल्या वर्षी लवकर या’ असा जयघोष करत दीड दिवसाच्या गणरायाला शुक्रवारी दुपारी विधिवतपणे निरोप देण्यात आला. शुक्रवारी दुपारी दीड दिवसाच्या गणरायाचे गोदावरी नदीपात्रात विसर्जन करण्यात आले. गुरुवारी लाडक्या गणरायाचे मोठ्या जल्लोषात स्वागत करण्यात आले होते.गणेशोत्सवानिमित्ताने अनेक भक्तगण घरोघरी श्रीगणेशाची दरवर्षी प्रतिष्ठापना करतात. कोणी दहा दिवस, तर कोणी दिवसांपर्यंत घरात गणेशाची प्रतिष्ठापना करत असतात. शुक्रवारी गणपती प्रतिष्ठापनेचा दीड दिवसांचा कालावधी पूर्ण झाल्याने भाविकांनी गंगाघाटावर गोदावरी नदीपात्रात गणरायाच्या मूर्तीचे विसर्जन करून दीड दिवसांच्या गणरायाला भक्तिमय वातावरणात निरोप दिला. या दीड दिवसांच्या गणरायाला निरोप देण्यापूर्वी गणेशभक्तांनी विधिवतपणे गणेशाचे पूजन करून महाआरती व मोदकाचा नैवेद्य चढवून लाडक्या गणरायाकडे सर्व काही मंगल राहू दे, अशी प्रार्थना करून बाप्पांचे नदीपात्रात विसर्जन करत निरोप दिला.