ई-फेरफार प्रणालीत नंदुरबार राज्यात प्रथम

नाशिक : महसूल विभागाशी निगडित नोंदणीकृत तसेच अनोंदणीकृत प्रलंबित असलेल्या फेरफार नमुन्यात जमिनीची खरेदी-विक्री, वारस नोंदी, शेतजमिनीवर बोजा लावणे अशा ई-फेरफारमध्ये नाशिक विभागाने राज्यात अव्वल कामगिरी केली आहे. उत्तर महाराष्ट्रातील नंदुरबार जिल्ह्याने या कामगिरीत प्रथम क्रमांक मिळविला असून, विभागातील पाचही जिल्ह्यांची कामगिरी पहिल्या पाचमध्ये राहिली आहे. महसूल विभागाच्या ई-फेरफार प्रणालीमध्ये प्रलंबित अनोंदणीकृत व नोंदणीकृत फेरफार यांची प्रलंबितता कमी करण्याबाबत नाशिक विभागात उल्लेखनीय कामकाज झाले असून, नाशिक विभागातील नंदुरबार, अहमदनगर, जळगाव, धुळे व नाशिक हे जिल्हे अनुक्रमे राज्यात एक ते पाच स्थानी आले आहेत. नंदुरबार हा आदिवासीबहुल जिल्हा राज्यात प्रथम क्रमांकावर आला आहे, अशी माहिती विभागीय आयुक्त राधाकृष्ण गमे यांनी दिली.

ई-फेरफार प्रणालीच्या अंमलबजावणीसाठी विभागीय आयुक्त कार्यालयामार्फत नाशिक विभागातील सर्व जिल्हाधिकारी यांच्या वेळोवेळी बैठका घेऊन त्यांचे अधीनस्त अधिकारी कर्मचारी यांच्या कामकाजाचा आढावा नियमित घेण्यात आलेला आहे. नाशिक विभागातील सर्व तलाठी व मंडल अधिकारी यांनी राज्यात ई-फेरफार प्रणालीमध्ये प्रलंबित फेरफार यांची प्रलंबितता कमी करून विभागातील जनतेला दिलासा देणारे कामकाज केले आहे, असे गमे यांनी यावेळी सांगितले.

ई-फेरफार नोंदीसाठी महाभूमी असे संकेतस्थळ विकसित करण्यात आलेले आहे.

--इन्फो--

राष्ट्रीय भूमी अभिलेख आधुनिकीकरण कार्यक्रमातील या कार्यक्रमाअंतर्गत संगणकीकृत सातबाराच्या डेटाचे अद्ययावतीकरण करणे, युनिकोडमध्ये रूपांतर करणे, तालुकास्तरावरील महसूल कार्यालयांची समांतर जोडणी करणे व दुय्यम निबंधक कार्यालयांची महसूल कार्यालयांशी जोडणी करणे या बाबी एकत्रित करण्यासाठी फेरफार प्रक्रिया राबविली जाते.