सामान्य रुग्णालयात आरोग्य साहित्याचे लोकार्पण

मालेगाव सामान्य रुग्णालयाला शासनाकडून प्राप्त झालेल्या विविध आरोग्य सुविधांच्या साहित्याचे लोकार्पण राज्याचे कृषी व माजी सैनिक कल्याणमंत्री भुसे यांच्या हस्ते करण्यात आले, यावेळी भुसे बोलत होते. यावेळी महापौर ताहेरा शेख, उपमहापौर नीलेश आहेर, बाजार समितीचे सभापती राजेंद्र जाधव, सखाराम घोडके, जी. पी. बच्छाव, प्रमोद शुक्ला, संजय दुसाणे, रामा मिस्तरी, राजेश गंगावणे, सामान्य रुग्णालयाचे वैद्यकीय अधीक्षक डॉ. हितेश महाले, अतिरिक्त जिल्हा शल्य चिकित्सक डॉ. योगेश पाटील, डॉ. शीलवंत, डॉ. राजेंद्र शिरसाठ, डॉ. पुष्कर आहेर, डॉ. सुमेध भामरे, डॉ. ओम जाधव, डॉ. आशिष अजमेरा, डॉ. वीरेंद्र पाटील, अधिसेविका रेखा माळी, बेधमुथा, स्वाती जाधव यांच्यासह सामान्य रुग्णालयातील अधिकारी व कर्मचारी उपस्थित होते.

मंत्री भुसे यांच्या हस्ते लहान मुलांच्या ६ वॉरमर, २ फोटो थेरपी युनिट व १० लहान मुलांच्या व्हेंटिलेटरचे लोकार्पण करण्यात आले. यावेळी मंत्री भुसे म्हणाले, २०० खाटांची क्षमता सामान्य रुग्णालयात उपलब्ध असून, भविष्यातील गरज लक्षात घेता कॅम्प भागातही लवकरच १०० खाटांचे सुसज्ज असे रुग्णालय उभारण्यात येणार आहे. सामान्य रुग्णालयाची गरज लक्षात घेता या इमारतीचे अजून दोन मजले वाढवून खाटांच्या क्षमतावाढीसाठी प्रयत्न केले जातील. सद्य:स्थितीत ३० कोरोनाचे रुग्ण उपचार घेत असून, पैकी स्थानिक ३ रुग्ण आहेत, तर इतर भागातील २७ रुग्णांवर उपचार सुरू आहेत. स्थानिकांसह इतर भागातील कोरोनाच्या रुग्णांना मोठा दिलासा देण्याचे काम सामान्य रुग्णालयाकडून होत आहे हे निश्चितच कौतुकास्पद आहे. रुग्णालयातील स्वच्छतेवर लक्ष केंद्रित करून खासगी रुग्णालयांप्रमाणे नियमित स्वच्छतेवर भर द्यावा, अशी सूचना देतानाच रुग्णांसोबत येणाऱ्या नातेवाइकांच्या सोयीसाठी शिवभोजनाची सुविधाही सामान्य रुग्णालय परिसरात उपलब्ध करून देण्यात आल्याचे मंत्री भुसे यांनी सांगितले.