मोटारसायकलच्या धडकेत एकाचा मृत्यू

दुर्घटना : येवला-नगरसूल मार्गावर अपघात

येवला : सायकलस्वाराला मोटारसायकलने धडक दिल्याने सायकलस्वाराचा मृत्यू झाल्याची घटना येवला-नगरसूल चौफुलीवर घडली. येवला तालुक्यातील नगरसूल येथील रेल्वे स्टेशनवर राहणारे एकनाथ गंगाधर चव्हाण (५०) हे सायकलवर दळण दळण्यासाठी नगरसूल गावात जात असताना, येवला-नगरसूल रस्त्यावरील चौफुलीवर नांदगावकडून येवल्याकडे जाणाऱ्या मोटारसायकलने (एमएच ४१ एजे ७७१४) धडक दिली. या धडकेत एकनाथ चव्हाण यांच्या डोक्याला गंभीर मार लागला. त्यांच्यावर नगरसूल ग्रामीण रुग्णालयात वैद्यकीय अधिकारी डॉ. महेंद्र पाटील यांनी उपचार केले. दरम्यान, गंभीर अवस्थेत चव्हाण यांना नाशिकला हलविले मात्र उपचारादरम्यान त्यांचा मृत्यू झाला. मोटारसायकलचालक विश्वनाथ जगन्नाथ भुसारे (३८), दत्तू नामदेव वाघ (४०), साकराबाई काशीनाथ भुसारे (६०) हे सर्व सावरगाव (ता. नांदगाव) येथील आहेत. विश्वनाथ भुसारे व साकराबाई भुसारे यांना गंभीर स्वरूपाची दुखापत झाली असल्याने त्यांना पुढील उपचारासाठी मालेगाव येथे हलविण्यात आले आहे. अधिक तपास नगरसूलचे सहायक पोलीस उपनिरीक्षक सुरासे, पोलीस निरीक्षक रूपचंद वाघमारे करीत आहेत. (वार्ताहर)