बाजारपेठ परिसरात मनपा पुरविणार डसबीन

ठळक मुद्देओला आणि सुका कचरा वर्गीकरणासाठी निळ्या आणि हिरव्या रंगाच्या डसबीन पुरविण्याचा निर्णय ६०० डसबीन खरेदीसाठी निविदा प्रक्रिया सुरु कचरा वर्गीकरणासाठी शहरात व्यापक स्तरावर प्रयत्न सुरु वर्गीकरण करुनच डसबीनमध्ये टाकण्याच्या सूचना

केंद्र सरकारच्या स्वच्छ भारत अभियानांतर्गत महापालिकेने शहरातील बाजारपेठांच्या भागात ओला आणि सुका कचरा वर्गीकरणासाठी निळ्या आणि हिरव्या रंगाच्या डसबीन पुरविण्याचा निर्णय घेतला असून त्यासाठी ६०० डसबीन खरेदीसाठी निविदा प्रक्रिया सुरु केली आहे.
महापालिका आयुक्त अभिषेक कृष्ण यांनी स्वच्छ भारत अभियानांतर्गत ओला व सुका कचरा वर्गीकरणासाठी शहरात व्यापक स्तरावर प्रयत्न सुरु केले आहेत. शहरातील नागरिकांना ओला व सुका कचरा वर्गीकरणाचे आवाहन करतानाच घंटागाडी ठेकेदारांकडून नागरिकांना डसबीन पुरविण्याच्याही सूचना देण्यात आल्या आहेत. त्यानुसार, काही ठेकेदारांनी डसबीनचे वाटपही केले आहे. आता महापालिकेने शहरातील प्रमुख बाजारपेठ असलेल्या भागात ओला व सुका कचरा संकलनासाठी हिरव्या व निळ्या डसबीन पुरविण्याचा निर्णय घेतला असून त्यासाठी पहिल्या टप्प्यात ६०० डसबीन खरेदीसाठी निविदा प्रक्रिया राबविली जात आहे. बाजारपेठ परिसरातील व्यावसायिकांना ओला व सुका कचरा वर्गीकरण करुनच डसबीनमध्ये टाकण्याच्या सूचना केल्या जाणार आहेत. दरम्यान, आरोग्याधिकारी डॉ. सुनील बुकाणे यांनी बाजारपेठांमधील ठिकाणांची पाहणी करत काही ठिकाणे निश्चित केली.