कोविड सेंटरमध्ये अनोख्या सेवाभावातून घडले राम अन‌् रहीमचेही दर्शन !

निफाड तालुक्यातील पाचोरेवणी येथील सरला पुरकर या महिलेचा पती मधुकर यशवंत पुरकर हे सहारा हॉस्पिटलमध्ये उपचार घेताना मृत पावले. मधुकर पुरकर यांचा मुंबई-आग्रा हायवेवर पाटीत द्राक्ष घेऊन ती विकण्याचा व्यवसाय होता. ते गेल्या सहा ते सात दिवसांपासून मेट्रो, सहारा हॉस्पिटलमध्ये उपचार घेत होते. पत्नी सरलाबाई कोरडी भाकरी खाऊन,पाणी पिऊन सहारा हॉस्पिटलखाली उन्हा-तान्हात झोपायची. कसेबसे त्यांनी पतीवर औषधोपचार केले, परंतु पतीला वाचविण्यात तिला यश आले नाही. तिला अशक्तपणा आला. झोप नाही, राहायला जागा नाही. डोक्याला, हातापायाला मुंग्या व चक्कर येणे सुरू झाले. हाती एक रुपयाही उरला नाही. अशावेळी हॉस्पिटलमधून बंडूकाका बच्छाव यांचा नंबर मिळाला. काकांनी तिच्या पतीवर अंत्यसंस्कार करून स्वतः अग्निडाग दिला. त्या महिलेला रिक्षात बसवून आपल्या राम रहीम कोविड सेंटरमध्ये आणले. एचआरसीटी काढला. त्या महिलेचाही स्कोर दहा आला.. तिला सलग नऊ दिवस स्वतःच्या दवाखान्यात ठेवून तिच्यावर उपचार केले. २३ हजारांचे मेडिकल व सर्व उपचाराचा खर्च असा जवळपास ६० हजार रुपये स्वतः खर्च बंडूकाकांनी केला.. त्याच दरम्यान त्या महिलेची सातवीत शिकणारी मुलगी प्राची मधुकर पुरकर घरी एकटी होती. महिला सारखी तिचा विचार करीत असायची. गावातील लोक तिला वाळीत टाकतील अशी तिला भीती वाटायची.लगेचच बंडूकाकांनी आणि त्यांच्या सौभाग्यवती ज्योती ताईंनी स्वतः जाऊन त्या मुलीला मालेगावी आणून सदर महिलेच्या स्वाधीन केले..त्यामुळे महिलेचा जीवात-जीव आला व तिची प्रकृती सुधारू लागली...रोज सलग ९-दिवस घरुन डबा आणून दिला.. रोज आपुलकीने चौकशी करायचे. त्यामुळेच त्या महिलेचा जीव वाचणे शक्य झाले..

या नऊ दिवसात त्या महिलेचा एकही नातेवाईक किंवा कोणीही विचारपूस करायला आला नाही. या सर्व दिवसात बंडू काकाच त्या महिलेचे आई-बाप-भाऊ-बहीण झाले.. यानंतर तिची प्रकृती पूर्णपणे ठीक झाल्यावर सर्व स्टाफने व बंडू काकांनी त्या महिलेला साडी-चोळी घेऊन तिच्या घरी सुखरूप पोहोचविले.. याचवेळी जैन संस्कार मंचने त्या महिलेचा जैन भवन येथे हार पुष्प देऊन सत्कार केला. तिला पाच हजारांचा धनादेश सुपूर्द केला. काकांनी आपल्या वैकुंठरथाच्या माध्यमातून गेल्या वर्षभरात अनेक कोरोनाग्रस्त मृतदेह स्वतः चालकाच्या बाजूला बसून त्यांच्यावर अंत्यसंस्कार केले..आणि अलीकडेच सात-आठ दिवसात बंडूकाकांनी अनेक जणांवर स्वतःच्या हाताने अंत्यसंस्कार केले. जे रक्ताच्या नात्याला जमले नाही, ते एका परक्या परंतु संवेदनशील भावाने करुन दाखविले, याचीच कोविड सेंटर परिसरात चर्चा सुरु होती.

===Photopath===

110521\11nsk_17_11052021_13.jpg

===Caption===

मालेगाव येथे कोरोनामुक्त झालेल्या सरला पूरकर या महिलेचा सतकार करुन  तिला निरोप देण्यात आला. त्याप्रसंगी बंडूकाका बच्छाव व वैद्यकीय कर्मचारी.