नाशिकरोड - परिसरामध्ये दिवसेंदिवस गुन्हेगारीचे प्रकार वाढतच आहे काही गुन्हेगारी प्रवृत्तीच्या लोकांनी काका-पुतण्याला स्टम्पने मारहाण केली तर रेल्वे पुलाजवळ पैशाची मागणी करत एकाने चाकूने इसमावर वार केल्याची घटना घडली. पुतण्याला मारहाण करणाऱ्या युवकाला विचारणा करण्यास गेलेल्या काकांना दोघा जणांनी स्टम्पने बेदम मारहाण करून मनगट फ्रॅक्चर केले.
आगर टाकळी, समतानगर येथील प्रवीण ढमाजी सोनवणे यांनी दिलेल्या फिर्यादीत म्हटले आहे की, सोमवारी रात्री साडेअकराच्या सुमारास त्यांचा पुतण्या जयेशला संशयित नितीन अरुण गांगुर्डे, विक्रांत अनिल गांगुर्डे (समतानगर, टाकळी) हे मारहाण करत होते. सोनवणे यांनी पुतण्याला मारहाण का करता, असे विचारले असता त्याचा राग धरत या दोघांनी त्यांनाही स्टम्पने मारहाण करून मनगट फ्रॅक्चर केले. याप्रकरणी उपनगर पोलीस ठाण्यात गुन्हा दाखल करण्यात आला आहे.
चाकूहल्ल्यात युवक जखमी
चेहेडी पंपिग येथून देवळाली गावाकडे जाणाऱ्या रस्त्यावरील रेल्वे पुलाजवळ इसमाला पैसे दिले नाही म्हणून मारहाण करून अज्ञात युवकाने पोटावर व डोक्यावर चाकूने वार करून जखमी केले.
विनोद पोपा वाघेला हा शुक्रवारी रात्री सव्वासातच्या सुमारास देवळालीगावाकडे जाणाऱ्या रस्त्यावरील रेल्वे पुलाजवळील पाण्याच्या टाकीजवळून दुकानात सामान घेण्यास जात होता.यावेळी एका अनोळखी व्यक्तीने त्याच्याकडे पैसे मागितले. वाघेलाने पैसे देण्यास नकार दिल्यानंतर त्या इसमाने लाथाबुक्याने मारहाण करून पोटावर व डोक्यात चाकूने वार करून गंभीर जखमी केले. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
तंबाखू न दिल्याने युवकास मारहाण
जेलरोडच्या इंगळेनगर येथे दोघे मित्र गप्पा मारत असताना तंबाखू दिला नाही म्हणून तिघा जणांनी युवकाला मारहाण करून डोक्यात दगड मारून दुखापत केली.
जेलरोड येथील अजय दिलीप राठोड याने दिलेल्या फिर्यादीनुसार आकाश गायकवाड याच्यासोबत ते गप्पा मारत होतो. यावेळी संशयित बाबा शाहा, बबन तांबे (जेलरोड, कॅनलरोड झोपडपट्टी) व त्यांचा एक साथीदार यांनी अजयकडे तंबाखू मागितली. अजयने नकार दिल्याने तिघा संशयितांनी अजयला लाथाबुक्यांनी बेदम मारहाण करून डोक्यात दगड टाकला.''तुझा बेत पाहतो'' असा दम दिला. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.