वर्षा लहाडेसह दोघांवर एमटीपीनुसार गुन्हा

गर्भपात प्रकरण : महिलेसह नातेवाईक आरोपी

नाशिक : जिल्हा रुग्णालयातील बेकायदेशीर गर्भपात प्रकरणी सरकारवाडा पोलिसांनी स्त्रीरोगतज्ज्ञ डॉ़ वर्षा शिवाजी लहाडे, डॉ़ कमलाकर उलाजी जाधव व गर्भवती महिला सीमा शरद शेजवळ या तिघांवरही गर्भपात कायद्याचे जाणीवपूर्वक उल्लंघन व विनापरवाना अवैध गर्भपात (द मेडिकल टर्मिनेशन आॅफ प्रेगनन्सी अ‍ॅक्ट १९७१ - एमटीपी) कायद्यान्वये गुन्हा दाखल करण्यात आला आहे़ डॉ, कमलाकर जाधव यांनी डॉ़ वर्षा लहाडे यांच्या सांगण्यावरून महिलेचा गर्भपात केल्याचे तसेच कागदपत्रांमध्ये फेरफार केल्याचा जबाब दिला असून, संबंधित महिलेस रक्तस्त्राव होत नसल्याचेही म्हटले आहे़ दरम्यान, एमटीपी कायद्यान्वये प्रथमच गर्भवती महिलेवर गुन्हा दाखल झाल्याची वैद्यकीय वर्तुळात चर्चा आहे़ डॉ़ विजय डेकाटे यांनी सरकारवाडा पोलीस ठाण्यात दिलेल्या फिर्यादीनुसार प्रयाग हॉस्पिटलमधील एका महिलेकडून २० हजार रुपये घेऊन जिल्हा रुग्णालयात तिचा बेकायदेशीरपणे गर्भपात केल्याची तक्रार महापालिकेच्या आरोग्य विभागाकडे आली ़ त्यानुसार जिल्हा रुग्णालयात चौकशी केल्यानंतर निफाड तालुक्यातील पिंपळगाव (ब) येथील सीमा शरद शेजवळ या महिलेचा गोळ्या देऊन गर्भपात केल्याचे आढळून आले़ या महिलेस डॉ़ लहाडे यांच्या खासगी प्रयाग हॉस्पिटलमधून जिल्हा रुग्णालयात दाखल करण्यात आले होते़ विशेष म्हणजे शेजवळ यांना गर्भपातानंतर डॉ़लहाडे यांच्या सूचनेनुसार त्वरित घरीही सोडण्यात आले़जिल्हा रुग्णालयात गर्भपातातील स्त्री जातीच्या गर्भ ताब्यात घेण्यास शेजवळ व तिच्या कुटुंबीयांना नकार दिला होता़ मात्र डॉक़मलाकर यांनी नातेवाइकांना फोन करून रात्री दहा वाजता हे अर्भक ताब्यात दिले़ मुळात डॉक़मलाकर यांनी पोलीस ठाण्यात दवाखाना नोंद (एमएलसी) तसेच अर्भकाचे शवविच्छेदन करणे गरजेचे होते़ मात्र डॉ़ कमलाकर यांनी तसे न करता अर्भक कुटुंबीयाकडे सोपविले़ जिल्हा रुग्णालयातील या गर्भपात प्रकारणाचा भांडाफोड झाल्यानंतर डॉ़ लहाडे यांनी आरोग्य उपसंचालक व अतिरिक्त आरोग्य सचिव डॉ़ पाटील यांनी चौकशी केली़ या चौकशी अहवालानुसार हे तिघेही दोषी आढळून येत असून, त्यांच्यावर गुन्हा दाखल करण्यात आला़, तर चौकशी काळात पथकास अ‍ॅट्रॉसिटी कायद्यान्वये गुन्हा दाखल करण्याच्या धमक्या देण्यात आल्याचेही फिर्यादित नमूद करण्यात आले आहे़दरम्यान, डॉ़ डेकाटे यांनी दिलेल्या फिर्यादित डॉ़ लहाडे, डॉ़ कमलाकर व गर्भवती महिला, तिचे नातेवाईक यांनी संगनमताने २४ आठवड्यांचे स्त्री गर्भाचा २१ मार्च दुपारी चार ते २२ मार्च दुपारी अडीच वाजेच्या दरम्यान सिव्हील हॉस्पिटलमध्ये गर्भपात केला असून, गर्भपात कायद्याचे जाणीवपूर्वक उल्लंघन व विनापरवाना अवैध गर्भपात केल्याचे म्हटले आहे़ त्यामुळे या तिघांवरही एमटीपी कायदा १९७१ च्या कलम ३, ४ (ब) व ५ अन्वये गुन्हा दाखल करण्यात आला आहे़ दरम्यान, म्हसरूळ पोलीस ठाण्यात दाखल असलेल्या गुन्ह्यात लहाडे यांनी अटकपूर्व जामिनावर न्यायालयात सुनावणी सुरू असली तरी हा नवीन व अजामीनपात्र गुन्हा दाखल झाल्याने त्यांना शोधण्याचे व अटक करण्याचे पोलिसांपुढे आव्हान आहे़ (प्रतिनिधी)