कसारा घाटात दरड कोसळली

कसारा घाटात दरड कोसळली

इगतपुरी : कसारा घाटात मुंबई - आग्रा महामार्गावर व रेल्वे रुळावर सकाळी ८ वाजेच्या सुमारास दरड कोसळल्याने महामार्ग व रेल्वेमार्ग बंद झाल्याने प्रवासी वाहतूक सेवा ठप्प झाली होती. परिणामी प्रवाशांचे अतोनात हाल झाले. दरड कोसळल्याने कोणतीही जीवितहानी झाली नाही. रेल्वेसेवा सात ते आठ तास बंद होती. जुन्या घाटातील महामार्गावरील वाहने नवीन मार्गाने वळविण्यात आली.
रेल्वेमार्गावरही दरड
संततधारेमुळे महामार्गावर दरड कोसळल्यानंतर काही वेळेतच मध्य रेल्वेच्या लोहमार्गावर सकाळी साडेआठ वाजेच्या सुमारास दरड कोसळली. त्यामुळे सकाळच्या सत्रात रेल्वेसेवा पूर्णत: ठप्प झाली. सुमारे आठ ते नऊ तास रेल्वेची सेवा बंद झाल्याने अनेक गाड्या रद्द करण्यात आल्या, तर काही गाड्या उशिराने धावत होत्या.
हॉटेल गणकाच्या मागील बाजूस नाशिकहून मुंबई (अप) रूळावर दरड कोसळली. दगड व मातीचा ढिगारा रूळावर आल्याने हा मार्ग वाहतुकीसाठी रेल्वेगाड्या बंद झाला होता. मार्गावरील माती व दगड काढण्याचे काम युद्धपातळीवर करण्यात येऊन मार्ग खुला करण्यात आला.
कसारा घाटात सकाळी ८ वाजेच्या सुमारास महामार्गावर दोन्ही बाजूला दरड कोसळल्याने महामार्ग ठप्प झाला होता. जुन्या घाटातील टिवाळा पॉइंट येथे दोन तीन झाडे व दगड-माती महामार्गावर कोसळल्याने तब्बल पाच ते सहा तास वाहतूक ठप्प झाली होती.
या महामार्गावरील वाहतूक नवीन कसारा घाटातून वळविण्यात आली होती, तर नवीन कसारा घाटातील दरड त्वरित काढून हा महामार्ग सुरळीत करण्यात आला होता.